سموگ: مصنوعی بارش دی تجویز، 35کروڑ خرچ ہون گے

لہور: سموگ دی روک تھام لئی کمشنر لہور ڈویژن آصف بلال لودھی نے مصنوعی بارش دے حوالے نال سمری سیکرٹری فنانس نوں گھل دتی۔

شہر وچ مصنوعی بارش کرن تے 35کروڑ روپے کرچ دا تخمینہ گھلیا گیا اے۔ کمشنر لہور ڈویژن آصف بلاول لودھی دا کہنا اے سیکرٹری خزانہ نوں سمری گھل دتی اے، راکٹ فائر دے ذریعے کلائوڈ سیڈنگ دا عمل وزیراعلیٰ پنجاب دی اجازت نال مشروط اے۔ جے اجازت مل گئی تے شہر دے سموگ زدہ وکھو وکھو علاقیاں وچ مصنوعی بارش کروائی جاوے گی، محکمہ موسمیات تے محکمہ ماحولیات دے احکامات تے بادل بنان لئی راکٹ فائر کیتے جان گے۔

کنلٹنسی لئی دبئی تے چین نال گل چل رہی اے ورکنگ پیپر تے پی سی ون دی تیاری وزیراعلیٰ دی اجازت دے بعد شروع کر دتی جاوے گی۔ آن والے ورھیاں وچ سموگ گھٹ نہیں سگوں ودھ شدت اختیار کرے گی۔ کمشنر لہور دا کہنا اے کہ محکمہ ماحولیات نوں کلاؤڈ سیڈنگ ول آنا ہووے گا تاں جے شہری ایس پریشانی توں بچ سکن۔