پاکستان، قطر دی ثالثی: ایران تے امریکہ وچکار گل بات دی نگرانی لئی کمیٹی اُتے اتفاق
اسلام آباد: پاکستان تے قطر ولوں ایران امریکہ گل بات دا سانجھا اعلامیہ جاری کیتا گیا اے جس دے مطابق حتمی معاہدے لئی سٹھ (60) روزہ روڈ میپ طے، گل بات دی نگرانی لئی کمیٹی دے قیام اُتے اتفاق کیتا گیا اے۔
دفتر خارجہ دے مطابق اسلام آباد مفاہمتی یادداشت دے فریم ورک دے تحت اعلیٰ پدھر اُتے گل بات دا پہلا دور سوئٹزرلینڈ دے شہر برگن اسٹاک وچ مک گیا، ایہناں مذاکرات وچ ایران، امریکہ، تے ثالثی کرن والے دوواں ملکاں قطر تے پاکستان دے نمائندیاں نے شرکت کیتی۔
لیک لوسرن سربراہی اجلاس مثبت تے تعمیری ماحول وچ ہویا، گل بات وچ حوصلہ ودھاؤن والی پیش رفت ہوئی، جس وچ ہور تکنیکی بات چیت لئی اک نویں طریقے دا قیام وی شامل اے۔
مفاہمتی یادداشت دی بنیاد اُتے فریقین نے اک اعلیٰ پدھری کمیٹی دے قیام اُتے اتفاق کیتا اے، جو ثالثی عمل دی سیاسی نگرانی کرے گی، مرکزی مذاکرات کار باقاعدگی نال ایس کمیٹی نوں رپورٹ پیش کرن گے تے جوہری معاملیاں، پابندیاں، نگرانی تے جھیڑیاں (تنازعات) دے حل بارے ورکنگ گروپس دی قیادت کرن گے تاں جے مفاہمتی یادداشت تے دوجے معاملیاں اُتے اثر دار عمل درآمد یقینی بنایا جا سکے۔
اعلیٰ پدھری کمیٹی نے 60 دناں دے اندر اک حتمی معاہدے تیکر اپڑن لئی روڈ میپ اُتے اتفاق کیتا اے، جس نال فوراً ہور تکنیکی مذاکرات دا آغاز ممکن ہووے گا، ایس توں وکھ مفاہمتی یادداشت دے پیراگراف 5 وچ دسے گئے ویلے لئی فریقین وچکار اک مواصلاتی رابطہ لائن وی قائم کیتی گئی اے تاں جے غلط فہمیاں تے حادثیاں توں بچیا جا سکے تے آبنائے ہرمز توں لنگھن والے تجارتی جہازاں دی محفوظ آمدورفت نوں یقینی بنایا جا سکے۔
فریقین نے اک ڈی کنفلکشن سیل (جھگڑے توں بچاؤ دے رابطہ مرکز) دے قیام اُتے اتفاق کیتا اے، جس وچ فریقین تے جمہوریہ لبنان شامل ہون گے تے جس نوں ثالث ملکاں دی مدد حاصل ہووے گی، ایس دا مقصد لبنان وچ فوجی کارروائیاں دے خاتمے بارے مفاہمتی یادداشت اُتے عمل درآمد نوں یقینی بنانا اے، سارے معاملیاں اُتے تکنیکی مذاکرات ہفتے دے باقی دناں وچ برگن اسٹاک ریزورٹ وچ جاری رہن گے۔
اعلامیہ دے مطابق ثالثی کرن والے ملک ایہہ گل یقینی بناؤن لئی اپنی پوریاں کوششاں جاری رکھن گے کہ گل بات مثبت تے تعمیری ماحول وچ اگے بڑھدی رہے تے آخر کار اک حتمی معاہدے تیکر اپڑیا جا سکے۔
قطر تے پاکستان نے امریکہ تے ایران ولوں سفارت کاری تے جھیڑے دے پرامن حل لئی جاری عزم نوں سراہیا اے، دوواں ثالث ملکاں نے دوست تے بھرا ملکاں دا وی شکریا ادا کیتا اے جنہاں نے مذاکراتی عمل وچ لگاتار تعاون تے قیمتی کردار ادا کیتا۔
