حکومت نال گل بات بارے کوئی گل نہیں ہو رہی: بیرسٹر گوہر

اسلام آباد: پی ٹی آئی دے چیئرمین بیرسٹر گوہر نے آکھیا اے کہ حکومت نال کسے وی فورم اُتے گل بات (مذاکرات) بارے فی الحال کوئی گل نہیں ہو رہی۔

تحریک انصاف دے چیئرمین بیرسٹر گوہر نے پارلیمنٹ ہاؤس وچ میڈیا نال گل بات کردیاں آکھیا کہ وزیراعظم دی گل بات دی دعوت نوں جی آیاں نوں (ویلکم) آکھیا اے، پر حکومت نال کسے وی فورم اُتے مذاکرات بارے فی الحال کوئی گل نہیں ہو رہی، گل بات اک بڑا ای سنجیدہ کم اے ایس لئی کتے بیٹھنا پوے گا۔

اوہناں نے آکھیا کہ سانوں سارے نوں ذاتی انا توں باہر نکل کے کچھ کرنا پوے گا، سوچیا سی ہتھ ملاؤن نال معاملے بہتر ہون گے، محمود اچکزئی نے آپ جا کے وزیراعظم نال ہتھ ملایا، مذاکرات ساڈی سدھر (خواہش) ضرور نیں پر ایہہ صاف کر دیاں کہ ہجے تیکر کسے وی پدھر اُتے کوئی رابطہ نہیں ہویا، جے تیکر لوک بانی پی ٹی آئی دے نال نیں اوہ مائنس نہیں ہو سکدے، ایس معاملے دا کوئی نہ کوئی حل کڈھنا پوے گا۔

بیرسٹر گوہر دا کہنا سی کہ میں سیاسی رہنماواں نوں جیلاں وچ ڈکݨ (پاؤن) دے بالکل خلاف آں، سیاست وچ مقابلہ کارکردگی اُتے ہونا چاہیدا اے نہ کہ جیلاں وچ ڈکݨ اُتے، ساڈی ایہہ ارداس (درخواست) اے کہ کل بانی پی ٹی آئی نال اوہناں دے ٹبر (فیملی) دی ملاقات ہووݨ دتی جائے۔