قاہرہ اجلاس دا اعلامیہ جاری: پاکستان، مصر، سعودیہ تے ترکیہ ولوں ایران امریکا مفاہمت دا خیرمقدم
قاہرہ: مصر وچ پاکستان، سعودی عرب تے ترکیہ دے وزرائے خارجہ دے چوتھے مشاورتی اجلاس دا سانجھا (مشترکہ) اعلامیہ جاری کر دتا گیا اے۔
اعلامیے دے مطابق چاروں دیساں دے وزرائے خارجہ نے علاقائی تے بین الاقوامی حالات اُتے تفصیلی گل بات کیتی تے مشرق وسطیٰ سمیت وڈے خطے وچ امن، سلامتی تے استحکام نوں ودھاؤݨ لئی لگاتار مشاورت تے باہمی ہم آہنگی نوں حدوں ودھ اہم قرار دتا۔
ایسے طرحاں مصر دے صدر عبدالفتاح السیسی ولوں مشرق وسطیٰ لئی پیش کیتے گئے ویژن دی تعریف کردیاں ہویاں آکھیا گیا کہ ایہہ خطے وچ استحکام لئی رہنمائی فراہم کردا اے۔
وزرائے خارجہ نے امریکا تے ایران دے وچکار اسلام آباد مفاہمتی یادداشت اُتے دستخطاں دا خیرمقدم کردیاں ہویاں ایہنوں کشیدگی وچ کمی تے جھیڑے (تنازع) دے خاتمے ول اک چنگا قدم قرار دتا۔
سانجھے اعلامیے وچ آکھیا گیا کہ جے کوئی جھیڑا (تنازع) ہوندا تے اوہ علاقائی سلامتی، عالمی سپلائی چینز تے بین الاقوامی تجارت لئی وڈے خطرے دا کارن بن سکدا سی۔
وزرائے خارجہ نے مفاہمت نوں ممکن بݨاؤݨ وچ علاقائی تے بین الاقوامی دھریاں (فریقوں) دی محنت نوں سراہیا تے زور دتا کہ اوہ اپنے وعدیاں اُتے پورا تے دیانتداری نال عمل نوں یقینی بݨاؤݨ۔
چاروں دیساں دے وزرائے خارجہ نے ایس تاریخی کامیابی وچ پاکستان دے اہم (کلیدی) کردار دی تعریف کیتی، جدکہ مذاکرات نوں کامیابی تیکر پہنچاؤݨ وچ قطر دی مدد نوں وی سراہیا۔
اعلامیے وچ گل بات دے اگلے مرحلے نوں چھیتی تے کامیابی نال پورا کرن تے باقی رہ جانے والے مسئلیاں دا پائیدار تے ساریاں دھریاں لئی منن جوگ حل لبھݨ دی لوڑ اُتے زور دتا گیا۔
ایس توں علاوہ اعلامیے وچ دَسیا گیا کہ اجلاس وچ ایہہ وی صاف آکھیا گیا کہ خلیجی عرب ملکاں تے شام دے امن و استحکام سمیت خطے دے سارے دیساں دے خدشات نوں دھیان وچ رکھیا جاݨا چاہیدا اے۔
وزرائے خارجہ نے ایس گل اُتے وی اتفاق کیتا کہ مسئلہ فلسطین مشرق وسطیٰ وچ امن، سلامتی تے استحکام لئی بنیادی حیثیت رکھدا اے تے فلسطینی کاز انصاف والے، پورے تے پائیدار امن دی کوشیشاں دا مرکز اے۔
ہور ایہہ کہ اجلاس وچ غزہ، مغربی کنارے تے مقبوضہ مشرقی بیت المقدس دی انسانی تے سیاسی حالت اُتے خاص دھیان دتا گیا تے فلسطینی لوکاں دے حقوق دے تحفظ تے خطے وچ پائیدار امن قائم کرن دی لوڑ اُتے زور دتا گیا۔
