اتر پردیش وچ 1000 سال پرانی تاریخی مسجد نوں ڈھاؤن دا نوٹس جاری
نئی دہلی: اترپردیش دے شہر وارانسی وچ 1000 سال پرانی تاریخی مسجد “گنجِ شہیداں” نوں ڈھاؤن (مسمار کرن) دا نوٹس جاری کر دتا گیا اے۔ بھارت وچ راج کرن والی بی جے پی دی ہندوتوا قیادت مسلماناں دی مذہبی تے ثقافتی سنہانپ (شناخت) نوں مٹاؤن اُتے تُل گئی اے، بھارتی ریاست اترپردیش دے تاریخی شہر وارانسی وچ بنی 1000 سال پرانی “گنجِ شہیداں” مسجد نوں ڈھاؤن دا نوٹس جاری کیتا گیا اے۔
مشہور بھارتی رسالے (جریدے) ‘مسلم مرر’ دی رپورٹ وچ دَسیا گیا کہ مودی سرکار مسلماناں دے مذہبی تے ثقافتی وجود نوں ختم کرن دے ایجنڈے اُتے تیزی نال چل رہی اے۔ رپورٹ وچ انکشاف کیتا گیا اے کہ مودی حکومت نے پچھلے 45 دِناں دے دوران 23 توں زیادہ مسجداں، مدرسے، عیدگاہواں تے درگاہواں ڈھائیاں نیں، ہن ہندوتوا سرکار ولوں 1000 سال پرانی تاریخی مسجد توں لے کے 200 سال پرانی درگاہواں تیکر نوں نشانہ بنایا جا رہا اے۔
صرف مئی توں ہن تیکر 20 توں زیادہ مسلم مذہبی تھاواں نوں مسمار کیتا جا چکیا اے، جبکہ اترپردیش دے ہی شہر سنبھل وچ اک 600 سال پرانی درگاہ نوں عدالت توں ریلیف نہ ملن توں بعد زمیں بوس کر (ڈھاء) دتا گیا۔
صدرِ پاکستان آصف علی زرداری نے وارانسی وچ 1000 سال پرانی گنجِ شہیداں مسجد نوں مسمار کرن دے نوٹس اُتے گہری تشویش دا اظہار کیتا اے۔ اپنے بیان وچ صدر زرداری نے آکھیا کہ بھارت مسلماناں دی تاریخ تے پچھان مٹاؤن دی پالیسی اُتے چل رہا اے، مودی سرکار ایہو جیہیاں کارروائیاں فوراً بند کرے تے اقلیتاں دے حقاں سمیت سانجھے ثقافتی ورثے دے بچاء نوں یقینی بنائے۔
دوجے پاسے، انسانی حقاں دی عالمی تنظیم “جسٹس فار آل” نے بھی بھارت وچ مسلم مذہبی تے تاریخی تھاواں نوں باقاعدہ طریقے نال مسمار کرن تے اوہناں نوں لاحق وڈے خطریاں اُتے گہری تشویش دا اظہار کردیاں ہویاں عالمی برادری توں نوٹس لین دا منگ کیتی اے۔
