“اسلام آباد دی مفاهمتی یادداشت اک لمے تے پکے جے معاہدے لئی راہ سدھی کرے گی: وزیراعظم”
اسلام آباد: وزیراعظم شہباز شریف ہوراں آکھیا اے کہ پاکستان نے ایران-امریکہ سمجھوتے وچ تاریخی کردار نبھایا اے، تے اگلے 60 دناں وچ پکے معاہدے دی آس اے۔
وزیراعظم شہباز شریف نے قومی اسمبلی وچ بولدیاں آکھیا کہ اپوزیشن لیڈر دی غیر موجودگی پاروں اوہ کجھ گلاں نہیں کرن گے، پر پاکستان نے ہُن دے ایران-امریکہ سمجھوتے دے عمل وچ اک تاریخی تے چنگا کردار نبھایا اے۔
وزیراعظم دا کہنا سی کہ کجھ دن پہلے امریکہ تے ایران وچکار ہون والی مفاہمتی یادداشت (سمجھوتے) اتے پاکستان نے وچولے (ثالث) دے طور تے دستخط کیتے۔ پاکستان نے سوئٹزرلینڈ وچ دوہاں دیساں وچالے دوریاں نوں گھٹ کرن تے گل بات دے عمل نوں کامیاب بناؤن لئی پورے زور نال سفارتی کوششاں کیتیاں۔
شہباز شریف نے آکھیا کہ اج امریکہ تے ایران وچکار جنگ بندی ہو چکی اے، جدکہ اگلے 60 دناں تک تکنیکی پدھر (لیول) اتے گل بات دا سلسلہ چلدا رہے گا۔ ایہ سمجھوتا اگے جا کے اک پورے تے لمبے چر تیکر رہن والے امن معاہدے دی شکل اختیار کر لوے گا۔
وزیراعظم نے آکھیا کہ پاکستان نے امن قائم کرن لئی تاریخی کردار نبھایا اے تے اج دنیا دے وڈے وڈے رسالیاں تے اخباراں وچ پاکستان دے اس چنگے کردار نوں سراہیا جا رہا اے۔ دنیا بھر دے اخباراں دے پہلے صفحیاں اتے پاکستان دا ناں آرہا اے، جیہڑا دیس دی سفارتی کامیابی دا وڈا ثبوت اے۔
اوہناں دا کہنا سی کہ پاکستان تے ایران وچکار بھراواں والے تعلقات پچھلے تن مہینیاں وچ ہور پکے ہوئے نیں، تے پاکستان خطے وچ امن، ٹکاء تے سانجھ نوں ودھاؤن لئی اپنا چنگا کردار نبھاؤندا رہے گا۔
دیس دی سیاسی حالت اتے گل کردیاں وزیراعظم نے آکھیا کہ جے الیکشن دی چھان بین کرنی اے تے فیر 2018 دے عام الیکشن توں شروعات کیتی جائے۔ 2018 دے الیکشناں وچ جادوگری ہوئی سی تے ڈبے بھرے گئے سن۔ جے پاکستان تحریک انصاف نوں چھان بین دا اینا ہی شوق اے تے فیر 2018 دے الیکشناں دی پوری پڑتال ہونی چاہیدی اے۔
شہباز شریف نے ہور آکھیا کہ “گل نکلی تے فیر دور تیکر جائے گی”، لئی سچائیاں نوں سہمنے لیاؤنا ضروری اے۔ اوہناں نے اپوزیشن لیڈر دی تقریر نوں سچ دے الٹ قرار دیندیاں آکھیا کہ ایوان وچ کیتیاں گئیاں کجھ گلاں ٹھیک نہیں سن۔
وزیراعظم نے وفاقی اکائیاں وچکار سانجھ تے یکجہتی اتے زور دیندیاں آکھیا کہ اج سارے صوبیاں وچ آپسی پیار تے اکمٹھتا موجود اے تے چاراں صوبیاں نوں ترقی دی دوڑ وچ برابر دا شریک ہونا چاہیدا اے۔ پنجاب ہر نکے 11 ارب روپے دوجے صوبیاں نوں اپنے حصے وچوں دے رہا اے تاکہ قومی یکجہتی تے برابر دی ترقی نوں شہہ مل سکے۔
اوہناں نے ہور دسیا کہ ایران دے صدر اج پاکستان پہنچ رہے نیں، ایہ پھیرا پاکستان دی سدے (دعوت) اتے ہو رہا اے، جس وچ دوہاں پاسیاں دے تعلقات، کاروباری سانجھ، خطے دے امن تے استحکام سنے وکھو وکھ معاملیاں اتے اہم ملاقاتاں تے صلاح مشورے ہون گے۔ پاکستان اپنے سارے گوانڈھی دیساں نال تکڑے تے سجنتا والے تعلقات چاہندا اے۔
