سحر پروگرام دا آغاز، عورتاں نوں گھر بیٹھے ہنر سکھایا جائے گا: مریم نواز
97 کروڑ روپے مختص، 5365 عورتاں نوں ووکیشنل ٹریننگ دتی جائے گی، لیپ ٹاپ تے ماہانہ وظیفہ وی دیاں گے: وزیراعلیٰ
لاہور، فیصل آباد، راولپنڈی، ملتان تے گوجرانوالہ وچ ہاسپٹیلٹی ٹریننگ کورس دے پہلے بیج (گروپ) دی ٹریننگ پوری
لاہور (اے پی پی، مانیٹرنگ ڈیسک)
وزیراعلیٰ پنجاب مریم نواز ہوراں دے دوراندیش قدماں ہیٹھ پنجاب دیاں دھیاں لئی پہلی واری “سکل انہانسمنٹ تھرو ہوم ریچ پروگرام” (سحر) ورگا اک منیا پرمنیا پراجیکٹ شروع کر دتا گیا اے۔ اس حوالے نال وزیراعلیٰ مریم نواز دا کہنا اے کہ ویمن ڈویلپمنٹ ڈیپارٹمنٹ دے تحت پنجاب بھر دیاں عام عورتاں نوں گھر بیٹھے فنی تربیت دتی جائے گی تے اوہناں نوں ہنرمند بنایا جائے گا۔ ہنرمند لیبر فورس وچ عورتاں دا حصہ ودھاؤن لئی سحر پروگرام اتے 97 کروڑ روپے توں ودھ دا خرچہ آئے گا۔ صوبے بھر وچ 5365 عورتاں نوں گھر بیٹھے مارکیٹ دی لوڑ مطابق ووکیشنل ٹریننگ دتی جائے گی۔ دور دراز، نیم شہری (سیمی اربن) تے شہری علاقیاں وچ بیوٹیفیکیشن سروسز، ہاسپٹیلٹی تے ڈیجیٹل ٹیکنالوجی دے ٹریننگ کورس کرائے جان گے۔
پی ڈی سی پی دے ماتحت ادارے آئی تھم (ITHM) دی سانجھ نال 1260 عورتاں لئی ہاسپٹیلٹی کورس کرائے جان گے۔ سحر پروگرام دے تحت ہاسپٹیلٹی دی ٹریننگ لین والیاں عورتاں نوں کلنری آرٹس (کھانا پکانا)، بیکنگ، گیسٹ ریلیشن، فرنٹ ڈیسک تے ایئر لائن مینجمنٹ سکھائی جا رہی اے۔ لاہور، فیصل آباد، راولپنڈی، ملتان تے گوجرانوالہ وچ سحر پروگرام دے تحت ہاسپٹیلٹی ٹریننگ کورس دے پہلے گروپ نے اپنی ٹریننگ پوری کر لئی اے۔ لاہور، فیصل آباد، راولپنڈی تے ملتان وچ ٹریننگ لین والیاں عورتاں نوں ہیر اسٹائلنگ، سکن کیئر، میک اپ تے نیل آرٹ وی سکھایا جا رہا اے۔
2040 ٹریننگ لین والیاں عورتاں نوں پی ایس ڈی ایف (PSDF) دی سانجھ نال چھ مہینے دا ڈیجیٹل سکل دا ٹریننگ کورس کرایا جائے گا۔ سحر پروگرام دے تحت ٹرینی عورتاں نوں لیپ ٹاپ، انٹرنیٹ ڈیوائس، ڈیٹا پیکیج تے ماہانہ وظیفہ وی ملے گا۔ وزیراعلیٰ مریم نواز شریف نے سحر پروگرام وچ ٹریننگ پوری کرن والیاں عورتاں لئی کامیابی دی دعا کیتی تے چنگیاں تمناواں دا اظہار کیتا۔
وزیراعلیٰ مریم نواز شریف نے آکھیا کہ پنجاب دی عورت معاشی طور تے تکڑی ہوئے گی تے دیس، خاص کر پنجاب ترقی کرے گا۔ پنجاب دی ویمن پاپولیشن (عورتاں دی آبادی) نوں اک قیمتی سرمایہ بنا رہے آں، سحر پروگرام شروع کرن دا مقصد عورتاں نوں ترقی دے موقعے دینا اے۔ بیوہ، طلاق یافتہ تے گھٹ گنتی (مینارٹی) نال تعلق رکھن والیاں عورتاں نوں سحر پروگرام وچ پہل دتی جائے گی۔ وزیراعلیٰ پنجاب نے آکھیا کہ عورتاں لئی پہلی واری گھر دے بوہے اتے ووکیشنل سکل پروگرام دے وڈے چنگے نتیجے سامنے آؤن گے۔ ٹریننگ کورس کرن والیاں عورتاں سکھالے طریقے نال اپنا روزگار کما کے معاشرے دیاں مفید شہری بن سکدیاں نیں، حکومت پنجاب سحر پروگرام دے تحت ٹرینی عورتاں لئی نوکریاں لبھن (جاب پلیسمنٹ) دے موقعے وی پیدا کرے گی۔ پنجاب وچ عورتاں لئی گھر دے بوہے اتے ووکیشنل ٹریننگ دا مقصد مرد تے عورت نوں برابری دے موقعے دینا اے۔
