ایران دے صدر ڈاکٹر مسعود پزشکیان اک روزہ دورے تے اسلام آباد پہنچ گئے، بھرواں استقبال
اسلام آباد: ایران دے صدر ڈاکٹر مسعود پزشکیان اک روزہ دورے تے اسلام آباد پہنچ گئے جتھے اوہناں دا سرکاری پدھر تے بھرواں استقبال کیتا گیا۔
ایرانی صدر ڈاکٹر مسعود پزشکیان دے جہاز نے اسلام آباد دے نور خان ایئربیس تے لینڈ کیتا جتھے صدر آصف زرداری، وزیراعظم شہباز شریف تے نائب وزیراعظم اسحاق ڈار نے ایرانی صدر دا استقبال کیتا، وزیر داخلہ محسن نقوی، وزیر اطلاعات عطا تارڑ تے پیپلز پارٹی دے چیئرمین بلاول بھٹو وی اوتھے موجود سن۔
ایرانی صدر جس جہاز تے پاکستان آئے نیں، اوہدا ناں ‘میناب’ ایران وچ سکول تے حملے وچ شہید ہون والے بچیاں دے ناں تے رکھیا گیا اے۔ ایرانی صدر دا جنگ توں بعد کسے وی ملک دا ایہہ پہلا دورہ اے، اوہناں دے نال پارلیمانی سپیکر باقر قالیباف تے وزیر خارجہ عباس عراقچی وی آئے نیں، ایرانی صدر نوں فضائیہ دے جے ایف 17 طیاریاں تے 21 توپاں دی سلامی وی دتی گئی۔
پاکستان دی وزارتِ خارجہ دے بیان مطابق ایرانی صدر مسعود پزشکیان دے نال اک اعلیٰ پدھر دا وفد وی اے جس وچ وزراء تے ہور سینئر حکام شامل نیں ۔
ایران دے نیم سرکاری میڈیا ادارے ‘تسنیم’ مطابق صدر مسعود پزشکیان نے روانگی توں پہلاں پاکستان دے کردار دی تعریف کردیاں کہیا کہ اسلام آباد دیاں کوششاں قابلِ ذکر سن۔ تسنیم مطابق ایرانی صدر نے ایہہ وی کہیا کہ ایس دورے دا مقصد نہ صرف پاکستان دے تعاون دی تعریف کرنا اے بلکہ امریکہ نال معاہدے تے عملدرآمد دا جائزہ لینا وی اے تاکہ ایس گل نوں پکا کیتا جا سکے کہ ساریاں شقاں تے بین الاقوامی قنوناں تے ایران دے جائز حقاں مطابق عمل کیتا جائے۔
پزشکیان نے ہور کہیا کہ معاہدے تے عملدرآمد کئی علاقائی مسلیاں نوں گھٹ کرن وچ مدد دے سکدا اے تے ایسے ویلے وچ زیادہ توں زیادہ امن پیدا کر سکدا اے جڈوں اسلامی ملکاں دے خلاف اسرائیلی حملے تے فوجی جارحیت جاری اے۔ ایرانی صدر نے ایہہ وی کہیا کہ دورے دے دوران گل بات وچ دھیان تجارت، معیشت، ثقافت، سلامتی، دفاع تے وڈے پدھر تے علاقائی امن و امان وچ تعاون نوں ودھان تے ہووے گا۔
