ایم کیو ایم بجٹ تے ووٹ دے بدلے کیہ منگے گی؟
متحدہ قومی موومنٹ (ایم کیو ایم) پاکستان دا وفد اج وزیراعظم شہباز شریف نال ملاقات کرے گا۔
متحدہ قومی موومنٹ دے وفد وچ ایم کیو ایم دے چیئرمین خالد مقبول صدیقی، وفاقی وزیر صحت مصطفیٰ کمال، فاروق ستار تے امین الحق دے شامل ہون دی امید (امکان) اے۔
ذرائع دے مطابق بجٹ وچ حکومت دا ساتھ دین لئی شرائط پیش کیتیاں جاون گئیاں۔
متحدہ قومی موومنٹ دے سینئر رہنما نے دسیا کہ پارٹی نے فیصلہ کیتا اے کہ اوہ کراچی پیکج، گورنرشپ دی بحالی تے آئین دے آرٹیکل 140 اے وچ ترمیم لئی صاف تے بامعنی ٹائم ٹیبل دا مطالبہ کرے گی، انہاں تینویں معاملیاں تے پکی یقین دہانی توں بعد ای حکومت دا ساتھ دیوے گی۔
وزیراعظم شہباز شریف پیر دی رات سوئٹزرلینڈ توں دیس واپس اپڑے نیں، جدوں کہ خالد مقبول صدیقی دی سربراہی وچ ایم کیو ایم دا وفد ایس سلسلے وچ وفاقی وزیر قانون اعظم نذیر تارڑ نال پہلے ہی اک میٹنگ کر چکیا اے۔
ذرائع دے مطابق ایم کیو ایم دے چیئرمین خالد مقبول صدیقی نے وفاقی وزیر قانون تے صاف کر دتا سی کہ جے آئینی عہدہ واپس نہیں دتا جاندا تاں فیر ایم کیو ایم نوں وزارت دی وی لوڑ نہیں، جس تے وفاقی وزیر اعظم نذیر تارڑ دا کہنا سی کہ ایہہ سارے معاملے وزیراعظم ہی حل کر سکدے نیں.
قومی اسمبلی وچ ایم کیو ایم کول 22 ایم این اے تے سینیٹ وچ 3 اراکین نیں۔
پارٹی قیادت دی اج چنے ہوئے اراکینِ اسمبلی نال اسلام آباد وچ ملاقات وی متھی (طے) اے تاں جے سارے ایم این ایز نوں ایس معاملے تے اعتماد وچ لیا جا سکے۔
ایم کیو ایم وفاقی حکومت دی اہم اتحادی جماعت ہون پاروں (وجہ توں) ایہہ گل ہوندی نظر نہیں آؤندی کہ ایم کیو ایم اپنے مطالبے فوراً پورے نہ ہون دی صورت وچ بجٹ وچ حکومت دا ساتھ نہ دیوے، پر پکی یقین دہانی ہون تے (ن) لیگ نال معاملہ طے کر لیا جاوے گا۔
