اسرائیل دا جنوبی لبنان وچ سکیورٹی زون برقرار رکھن لئی کاروائیاں جاری رکھن دا اعلان
اسرائیل ولوں جنوبی لبنان وچ سکیورٹی زون برقرار رکھن لئی فوجی کاروائیاں جاری رکھن دا اعلان کیتا گیا اے۔ اسرائیلی وزیرِ اعظم، وزیرِ دفاع تے فوج دے سربراہ نے اک سانجھے (مشترکہ) بیان وچ آکھیا اے کہ اسرائیلی فوج جنوبی لبنان وچ سکیورٹی زون قائم رکھن لئی اپنیاں کاروائیاں جاری رکھے گی۔
ایس سانجھے بیان وچ صاف کیتا گیا اے کہ جنی دیر تک اسرائیلی فوج تے اوتھوں دے شہریاں نوں لاحق خطرے پورے طریقے نال مک نہیں جاندے، اونی دیر تک ایہ کاروائیاں جاری رہن گئیاں۔ اسرائیلی لیڈراں دا کہنا اے کہ ملک دے شہریاں تے فوج دی سلامتی اوہناں دا سب توں پہلا تے بنیادی اصول اے، جیہدے اُتے کسے وی قسم دا سمجھوتہ نہیں کیتا جائے گا۔ بیان دے مطابق جنوبی لبنان وچ فوجی کاروائیاں دا مقصد سرحد پار توں ہون والے حملیاں نوں ڈکنا (روکنا) تے اسرائیلی حدود نوں محفوظ بنانا اے۔
یاد رہے کہ لبنان تے اسرائیل دے وچکار مذاکرات دا اک ہور دور اج واشنگٹن وچ ہووے گا، جیہدا مقصد اسرائیل تے حزب اللہ دے وچکار جنگ بندی کروانا اے۔ دوجے پاسے، ایس توں پہلے امریکی میڈیا دا کہنا سی کہ سوئٹزرلینڈ وچ امریکہ تے ایران دے وچکار ہون والی گل بات وچ حزب اللہ دا معاملہ ہنگامی ایجنڈے وچ شامل اے، تے اسرائیل تنازع اُتے گل بات پہلے دیہاڑے ای کیتی جائے گی۔
