آزاد کشمیر اسمبلی الیکشن: گوشوارے تے کاغذات جمع کروان دی اج آخری تریخ
مظفرآباد: آزاد جموں و کشمیر قانون ساز اسمبلی دے الیکشن 2026 لئی الیکشن کمیشن وچ گوشوارے تے ریٹرننگ افسراں کول کاغذاتِ نامزدگی جمع کروان دی اج آخری تریخ اے۔
ترجمان الیکشن کمیشن دے مطابق، پاکستان وچ مقیم جموں و کشمیر دے مہاجرین دے حلقیاں توں کاغذات جمع کروان والے امیدواراں دی گنتی 148 ہو گئی اے۔ ریجنل پدھر تے میرپور ڈویژن توں 268، پونچھ ڈویژن توں 155، جدکہ مظفرآباد ڈویژن توں 201 امیدواراں نے اپنے کاغذاتِ نامزدگی جمع کروائے نیں۔ اینج مجموعی طور تے 45 انتخابی حلقیاں توں 772 امیدواراں ولوں کاغذات جمع کروائے جا چکے نیں۔
دوجے پاسے، پاکستان پیپلز پارٹی، مسلم کانفرنس تے جمعیت اہلحدیث آزاد جموں و کشمیر سمیت کئی وڈیاں سیاسی جماعتاں ولوں ہلے تک پارٹی ٹکٹ جاری نہیں کیتے جا سکے۔ مسلم لیگ (ن) نے 37 انتخابی حلقیاں لئی ٹکٹ جاری کر دتے نیں، جدکہ اوہناں دے وی 8 حلقیاں توں امیدوار فائنل ہونا ہلے باقی نیں۔ امین دسی جا رہی اے کہ سیاسی جماعتاں اگلے دو دناں دے اندر اپنے ٹکٹ جاری کر دین گیاں۔ الیکشن کمیشن وچ ہن تک 24 سیاسی جماعتاں رجسٹرڈ ہو چکیاں نیں۔
