چین نے دنیا دے سب توں تکڑے سپر کمپیوٹر دا اعزاز امریکہ توں کھو لئیا اے۔
چین نے امریکہ توں دنیا دے سب توں تکڑے سپر کمپیوٹر دا اعزاز نویں مشین نال کھو لئیا اے۔
لائن شائن نامی سپر کمپیوٹر نے دنیا بھر دے سپر کمپیوٹرز دی درجہ بندی “ٹاپ 500” وچ نمبرون پوزیشن حاصل کیتی اے۔
اہم گل ایہہ اے کہ چین نے ایہہ سپر کمپیوٹر اپنے ملک دیاں (مقامی) چپس تے سافٹ وئیر ورت کے تیار کیتا اے۔
ایس توں پہلاں آخری واری چین نے ایہہ اعزاز 2017 وچ حاصل کیتا سی، پر اودوں سپر کمپیوٹرز نوں کجھ حد تیکر باہرلے ملک دے (غیر ملکی) پرزیاں نال تیار کیتا جاندا سی۔
ہن امریکہ دیاں سخت پابندیاں دے باجوں (باوجود) چین نے اپنے ملک وچ ای چپس تے سافٹ وئیر تیار کیتے نیں، جنہاں نوں سپر کمپیوٹر لئی ورتیا گیا اے۔
لائن شائن نوں چین دے اک اجیہے قومی پراجیکٹ دے طور تے پیش کیتا گیا اے جیہدے راہیں دنیا دے اگے ایہہ ثابت کیتا جا رہیا اے کہ امریکی ہارڈ وئیر توں بغیر وی چین ٹیکنالوجی دی دنیا وچ اگے ودھ سکدا اے۔
ایس سپر کمپیوٹر نوں ہواوے چپس تے اپنے ملک وچ تیار کیتے گئے نیٹ ورکنگ آلات تے سافٹ وئیر دے راہیں تیار کیتا گیا۔
عام کمپیوٹرز دے الٹ (برعکس) سپر کمپیوٹرز ہزاراں آپس وچ جڑے (انٹرلنک) پراسیسرز تے مشتمل ہوندے نیں تے اوہناں نوں اوکھی گنت مت (پیچیدہ حساب کتاب) لئی ڈیزائن کیتا جاندا اے تاکہ وکھ وکھ شعبیاں وچ سائنسی ترقی نوں ممکن بنایا جا سکے۔
ایس توں پہلاں امریکی سپر کمپیوٹر “El Captain” نوں دنیا دا سب توں تکڑا سپر کمپیوٹر منیا جاندا سی تے اوہنے ایہہ پوزیشن 18 مہینیاں تیکر قائم رکھی۔
ایس لسٹ (فہرست) وچ سپر کمپیوٹرز دی درجہ بندی کمپیوٹنگ پاور exaflops دی بنیاد تے کیتی جاندی اے تے چینی سپر کمپیوٹر ہر سیکنڈ 2.2 exaflops دی طاقت رکھدا اے، جدوں کہ امریکی کمپیوٹر وچ ایہہ صلاحیت ہر سیکنڈ 1.8 اے۔
لائن شائن وچ موجود چپس امریکی مشیناں جِنیاں چنگیاں تے نہیں پر اوہناں نوں زیادہ بہتر طریقے نال اکٹھا کیتا گیا اے تے ایہہ مغربی مشیناں توں زیادہ پاور ورتدا اے۔
ایہہ سپر کمپیوٹر 42 میگا واٹ بجلی ورتدا اے، جیہڑی امریکی کمپیوٹر توں 40 فیصد زیادہ اے۔
