فیلڈ مارشل نال لیبیا دے نائب کمانڈر انچیف دی ملاقات، دوطرفہ تعلقات نوں اگے ودھاؤن تے زور
راولپنڈی: چیف آف آرمی سٹاف، فیلڈ مارشل سید عاصم منیر نال لیبیا دی عرب مسلح افواج دے نائب کمانڈر انچیف لیفٹیننٹ جنرل صدام خلیفہ نے ملاقات کیتی اے۔
پاک فوج دے شعبہ تعلقات عامہ (آئی ایس پی آر) دے مطابق جنرل ہیڈ کوارٹر (جی ایچ کیو) راولپنڈی وچ فیلڈ مارشل عاصم منیر نال لیبیا دی مسلح افواج دے نائب کمانڈر دی ملاقات ہوئی۔ جی ایچ کیو اپڑن تے معزز مہمان نوں تیناں مسلح افواج دے چاق و چوبند دستے ولوں گارڈ آف آنر پیش کیتا گیا۔
ملاقات دے دوران آپسی دلچسپی دے معاملیاں، علاقائی امن دی صورتحال، دفاعی تعاون تے دوہاں دیساں دیاں فوجاں وچکار عسکری تعلقات نوں ہور اگے ودھاؤن دے موقعیاں تے تفصیلی گل بات کیتی گئی۔
دوہاں پاسیاں توں دوطرفہ دفاعی تعلقات نوں ہور مضبوط کرن تے پیشہ ورانہ فوجی ٹریننگ تے سلامتی دے شعبیاں وچ تعاون نوں وڈا کرن دی لوڑ تے زور دتا گیا۔
ایس موقعے تے فیلڈ مارشل سید عاصم منیر نے آکھیا کہ پاکستان فوج بیلی دیساں نال امن، استحکام تے تعمیری تعاون نوں ودھاؤن لئی پکی اے۔
ایس موقعے تے لیبیا دی عرب مسلح افواج دے نائب کمانڈر انچیف لیفٹیننٹ جنرل صدام خلیفہ نے پاکستان دی مسلح افواج دی پیشہ ورانہ صلاحیتاں نوں سراہیا تے علاقے وچ امن و سلامتی نوں قائم رکھن لئی اوہناں دیاں خزمتاں نوں شاندار لفظاں وچ سلام پیش کیتا۔
