پی آئی اے طیارہ حادثے وچ پائلٹس تے ایئر ٹریفک کنٹرولر ذمہ دار قرار

اسلام آباد/کراچی: پی آئی اے طیارے دی عبوری تحقیقاتی رپورٹ تیار ہو گئی جہدے وچ طیارے دے کاک پٹ کریو تے ایئر ٹریفک کنٹرولر نوں حادثے دا ذمہ دار قرار دتا گیا اے۔ کراچی وچ حادثے دا شکار ہون والے پی آئی اے طیارے دی ابتدائی رپورٹ ایوی ایشن ڈویژن نوں مل گئی اے جہدے بعد ایوی ایشن ڈویژن وچ اعلیٰ سطح دا اجلاس ہویا جہدے وچ سیکرٹری ایوی ایشن، ڈی جی سول ایوی ایشن سنے دوجے حکام موجود سن۔ اجلاس وچ ایئر کرافٹ ایکسیڈنٹ اینڈ انوسٹی گیشن ٹیم دے سربراہ وی موجود سن جد کہ تحقیقاتی ٹیم دے سربراہ ایئر کموڈور عثمان غنی نے طیارہ حادثے دی رپورٹ اجلاس وچ پیش کیتی تے ابتدائی تحقیقات تے بریفنگ دتی۔ ابتدائی تحقیقاتی رپورٹ ایئر کرافٹ ایکسیڈنٹ انوسٹی گیشن بورڈ دے صدر عثمان غنی نے وزیر ہوا بازی غلام سرور خان دے حوالے کر دتی۔ وسیلیاں دا کہنا اے عبوری رپورٹ وچ طیارے دے کاک پٹ کریو تے ایئر ٹریفک کنٹرولر نوں حادثے دا ذمہ دار قرار دتا گیا اے جد کہ پی آئی اے تے سی اے اے نوں برابر دا ذمہ دار قرار دتا گیا، حادثیاں دی روک تھام وچ پی آئی اے تے سول ایوی ایشن اتھارٹی دا طریقہ کار وی نکام قرار دتا گیا اے۔ ذرائع نے آکھیا بلیک باکس ڈیٹا توں طیارہ وچ کسے تکنیکی خرابی دے شواہد نہیں ملے، ابتدائی رپورٹ وچ حادثہ انسانی غلطی نال پیش آن دا شبہ ظاہر کیتا گیا، حادثے دے شکار طیارے دے آلات تے سسٹمز دی جانچ دا اکم اجے جاری اے۔