“وزیر اعظم وزیروں نوں نتھ پاون: ایہو جیہا وزیر کابینہ وچ کیوں بیٹھا اے جیہڑا راولاکوٹ دے کشمیریاں نوں کشمیری ہی نہ سمجھے؟ بلاول اپنی گل تے قائم رہن: خواجہ آصف”
اسلام آباد: کشمیر دے حالات خراب، وزرا مسلے کھڑے کر رہے نے، اوہ معافی منگن نوں تیار نہیں: بلاول بھٹو۔ مولانا فضل الرحمن ثالثی لئی تیار، پرویز اشرف ولوں راولاکوٹ دے لوکاں توں معذرت۔ سپیکر صاحب! تانو اپنی ٹانگاں کنبن والی تقریر یاد اے؟: اچکزئی۔ میں تے ہے ہی ملنگ: ایاز صادق۔ جوائنٹ ایکشن کمیٹی نے جے ثالثی دی گل کیتی اے تے خوش آمدید: رانا ثنا اللہ۔
قومی اسمبلی دے اجلاس وچ کشمیر دے معاملے تے حکومتی تے اپوزیشن لیڈراں وچ تکھیاں گلاں ہوئیاں۔ چیئرمین پیپلز پارٹی بلاول بھٹو زرداری نے آکھیا کہ کشمیر وچ حالات بگڑ چکے نے تے کجھ وزرا وزیر اعظم دی مدد کرن دی بجائے خواریاں ودھا رہے نے۔ وزیر دفاع خواجہ آصف ایہہ کِداں کہہ سکدے نے کہ کجھ لوک کشمیر دا حصہ نہیں؟ اوہ معافی منگن نوں وی تیار نہیں، اجیہا وزیر کابینہ وچ کیوں بیٹھا اے؟ بلاول نے آکھیا کہ مولانا فضل الرحمن کشمیر دے حالات تے ثالثی لئی تیار نے، سارے مسلیاں دا سیاسی حل کڈھیا جائے۔
دوجے پاسے وزیر دفاع خواجہ آصف نے آکھیا کہ میں اپنے بیان تے قائم آں، برتھ سرٹیفکیٹ نال کوئی کشمیری یا پاکستانی نہیں بندا، کشمیریاں نے جاناں دتیاں نے تے اساں وی دتیاں نے۔ محمود خان اچکزئی نے سپیکر ایاز صادق نوں مخاطب کر کے آکھیا کہ تسی سپیکر او، ساڈیاں گلاں دا جواب دینا تہاڈا کم نہیں۔ تانو اپنی اوہ تقریر یاد اے جدوں تسی آرمی چیف بارے آکھیا سی کہ ٹانگاں کنب رہیاں سن؟ سانوں نہ چھیڑو، “نہ چھیڑ ملنگاں نوں”۔ جس تے سپیکر ایاز صادق نے جواب دتا کہ “میں تے ہے ہی ملنگ”۔ میں ۱۹۹۸ وچ پی ٹی آئی چھڈی سی تے ۲۰۰۱ وچ ن لیگ جوائن کیتی، میری کوئی ذاتی لڑائی نہیں۔
پیپلز پارٹی دے راجہ پرویز اشرف نے آکھیا کہ کشمیر بڑا حساس معاملہ اے، خواجہ صاحب تسی خود کشمیری او، حالات نوں ٹھنڈا کرن دی لوڑ اے، میں خواجہ آصف ولوں راولاکوٹ والیاں توں معذرت کرنا آں۔ رانا ثناء اللہ نے آکھیا کہ مولانا فضل الرحمن دی ثالثی دا استقبال کراں گے۔ پی ٹی آئی دے بیرسٹر گوہر نے آکھیا کہ اساں ۶ کروڑ وچوں ۳ کروڑ ووٹ لئے پر ساڈے بندے چُک لئے گئے۔ طارق فضل چوہدری نے آکھیا کہ حکومت مذاکرات چاہندی اے پر راستہ جوائنٹ ایکشن کمیٹی نے بند کیتا۔ علی محمد خان نے مشورہ دتا کہ وزیر اعظم تے اپوزیشن لیڈر مل بیٹھن تے سیاسی تناؤ گھٹ ہو سکدا اے۔ بعد وچ سپیکر نے اجلاس غیر معینہ مدت لئی ملتوی کر دتا
