ایمنسٹی انٹرنیشنل دی لہور دی سموگ تے ہنگامی تنبیہ جاری

لہور: ایمنسٹی انٹرنیشنل ولوں پاکستان دے صوبے پنجاب دے دارالحکومت لہور دی سموگ تے ”ہنگامی تنبیہ” جاری کردیاں آکھیا اے لہور وچ سموگ دی وجہ توں ہر شہری دی صحت نوں خطرہ اے۔ ایمنسٹی انٹرنیشنل نے وارننگ جاری کردیاں آکھیا حکومت پاکستان ہوا دی کوالٹی دے جانچ لئی جہڑے اقدامات کر رہی اے اوہ عالمی معیارات دے مطابق نہیں ۔ ایہو وجہ اے لوکائی نوں سموگ نال نبڑن لئی درکار جانکاری تے آگاہی نہیں دتی گئی۔

عالمی ادارے دے مطابق حکومت پاکستان اپنی عوام نوں آلودہ آب و ہوا توں بچان لئی ہنگامی اقدامات کرے، آبادی دے لحاظ نال پاکستان دے وڈے صوبے پنجاب وچ آب و ہوا زہریلی ہو گئی اے۔ زہریلی آب و ہوا دی وجہ توں لوکاں دی صحت تے زندگیاں شدید خطرے وچ نیں۔ ایمنسٹی انٹرنیشنل دا ہور کہنا اے سکول بند کر دتے گئے، ساہ دیاں بیماریاں ودھ رہیاں نیں، لوکاں نوں ساہ لین وچ دشواری اے، 13نومبر نوں لہور دی ایئر کوالٹی خطرناک حد 300توں وی تجاوز کرکے 556ہو گئی۔ ایمنسٹی انٹرنیشنل نے دنیا بھر وچ پھیلے ہوئے حامیاں نوں لہور دی آبادی لئی مہم چلان تے وی اکسایا، ایمنسٹی انٹرنیشنل نے وزیر ماحولیاتی دے ناں سیمپل خط وی جاری کیتا اے تاں جے ایہدے ویکھا ویکھی دنیا بھر توں بندے اپنے خدشات زرتاج گل تک اپڑان۔