“وینزویلا دے اثرات، بلوچستان وچ کل توں ہن تک 5 زلزلے ریکارڈ، ہور جھٹکیاں دا امکان”
کوئٹہ: (ویب ڈیسک) بلوچستان وچ کل توں ہن تک درمیانے درجے دے 5 زلزلے ریکارڈ کیتے گئے نیں، جدکہ اج سویرے بارکھان تے نیڑے تیڑے دے علاقیاں وچ 5.2 شدت دا زلزلہ وی ریکارڈ ہویا سی۔
محکمۂ موسمیات دے چیف میٹرولوجسٹ امیر حیدر لغاری دے مطابق بلوچستان تے خیبر پختونخوا یوریشین ٹیکٹونک پلیٹ اتے واقع نیں ۔ چیف میٹرولوجسٹ نے دسیا اے کہ ایہہ زلزلے ایسے پلیٹ دی اوپری سطح اتے آ رہے نیں تے ایہہ عالمی زلزلیاں دا اثر اے، وینزویلا وچ آون والے زلزلے توں بعد پیدا ہون والی توانائی دیاں لہراں جڑیاں ہوئیاں پلیٹاں اتے زلزلیاں دی وجہ بن رہیاں نیں ۔
اوہناں نے ہور آکھیا کہ 2000ء توں 2011ء دے دوران انڈونیشیا وچ آون والے وڈے زلزلیاں توں بعد کشمیر وچ تباہ کن زلزلہ آیا سی۔ چیف میٹرولوجسٹ دے مطابق زمین وچ پیدا ہون والی توانائی دیاں لہراں دے مکّن تک ہور زلزلے وی آ سکدے نیں، پر سائنسی طور اتے زلزلے دے صحیح وقت تے آخری شدت دی پیشگوئی کرنا ناممکن اے۔
خیال رہے کہ زلزلہ پیما مرکز دے مطابق سبی وچ زلزلے دی شدت 4.2 جدکہ کوہلو وچ 5 ریکارڈ کیتی گئی، سبی وچ زلزلے دی ڈونگھائی (گہرائی) 42 کلومیٹر جدکہ کوہلو وچ 18 کلومیٹر ریکارڈ کیتی گئی۔ زلزلہ پیما مرکز دے مطابق سبی وچ زلزلے دا مرکز شہر توں 57 کلومیٹر اتر چڑھدے (شمال مشرق) وچ سی، جدکہ کوہلو وچ زلزلے دا مرکز شہر توں 65 کلومیٹر اتر چڑھدے وچ واقع سی۔
