چلاس وچ کلاؤڈ برسٹ توں بعد آن والے خوفناک سیلابی ریلّیاں نے تباہی مچا دِتی
چلاس: تھور ویلی وچ کلاؤڈ برسٹ توں بعد آن والیاں خوفناک سیلابی ریلّیاں نے مختلف تھاواں اُتے وڈی تباہی مچا دِتی۔ مکان، باغات، فصلاں، رابطہ پل تے گاڈیاں سیلابی ریلّے وچ رُڑھ گئیاں۔
تفصیلاں دے مطابق چلاس دی تھور ویلی وچ اچانک کلاؤڈ برسٹ توں بعد آن والیاں خوفناک سیلابی ریلّیاں نے وسیع پیمانے اُتے تباہی مچا دِتی۔
پولیس حکام دے مطابق سیلابی ریلّے اپنے رستے وچ آؤن والے کئی مکان، قیمتی سامان، باغات، فصلاں، رابطہ پل تے گاڈیاں بہا کے لے گئے۔
سیلابی ریلّے واپڈا کالونی وچ وی داخل ہو گئے، جس دے نتیجے وچ کالونی تے نال دیاں سڑکاں نوں شدید نقصان پہنچیا۔ ایس توں علاوہ تھور میک دے مقام اُتے اک مسجد وی سیلابی ریلّے دی زد وچ آ گئی۔
تھور شیتن دے علاقے وچ وسیع زرعی زمین تے تیار فصلاں مکمل طور اُتے تباہ ہو گئیاں، جدکے مقامی لوکاں دے مال مویشی تے نقدی وی سیلاب دی نذر ہو گئی۔
پولیس دے مطابق کلاؤڈ برسٹ دے فوراً بعد ریسکیو کارروائیاں شروع کر دِتیاں گئیاں سن، جس دے نتیجے وچ متاثرہ تھور دے دو اہم مقاماں اُتے رابطہ سڑکاں ٹریفک لئی بحال کر دِتیاں گئیاں۔
ایس دوران سیلاب دی تباہ کاری دے وچکار امانت داری دی اک قابلِ مثال کہانی وی سامنے آئی۔ سیلابی ریلّے وچ اک مقامی شہری دے رُڑھ جان والے 4 لاکھ روپے واپڈا کالونی دے نیڑے ملے، جنہاں نوں لبھن والے شہریاں نے مکمل امانت داری دا مظاہرہ کردے ہوئے فوراً اصل مالک دے حوالے کر دِتا۔
