“پاکستان دنیا وچ پیس میکر بن گیا، ہن معاشی قوت بننا اے : اسحاق ڈار”

حکومت بہتر معیشت لئی اقدامات کر رہی اے، میڈیا نال گل بات، داتا گنج بخشؒ دے مزار نوں عرقِ گلاب نال غسل دتا، چادر پوشی

لاہور (سیاسی نمائندہ، مانیٹرنگ ڈیسک، نیوز ایجنسیاں) نائب وزیراعظم تے وزیر خارجہ اسحاق ڈار نے آکھیا اے کہ پاکستان نے حالیہ ایران امریکہ تناء وچ ثالثی تے سہولت کاری دا کردار ادا کر کے خطے وچ امن دے قیام وچ اہم حصہ پایا، دنیا اج پاکستان نوں “پیس میکر” دے طور اتے جان رہی اے تے ہن ملک نوں معاشی قوت بنانا حکومت دا اگلا ہدف اے۔

لاہور وچ میڈیا نال گل بات کردیاں اسحاق ڈار نے آکھیا کہ وزیراعظم شہباز شریف دی قیادت تے فیلڈ مارشل سید عاصم منیر دی کوششان نال پاکستان نے امن دے قیام لئی موثر سفارتی کردار ادا کیتا۔ حالیہ علاقائی تناء دے دوران پاکستان نے ایران اتے حملے دی فوراً مذمت کیتی تے اوکھے ویلے وچ ایران دے نال کھڑا رہا۔ پاکستان نے امریکہ تے ایران دے وچکار سہولت کاری دا کردار ادا کیتا، جس دے نتیجے وچ دوویں ملک 47 سالاں بعد مذاکرات دی میز اتے آئے۔

اسحاق ڈار نے آکھیا کہ پاکستان اک ذمہ دار ایٹمی قوت اے، امن پسند ملک اے تے اقوامِ متحدہ دے چارٹر دے مطابق سارے ملکاں دی خود مختاری تے سالمیت دا احترام کردا اے پر جے کسے نے پاکستان ول میلی اکھ نال دیکھن دی کوشش کیتی تاں اوہدی اکھاں کڈھ دیاں گے۔ پاکستان اپنے دفاع توں غافل نہیں، اسیں امن چاہندے آں پر اپنی خود مختاری تے سلامتی دی حفاظت کرنا وی جاندے آں۔ پاکستان نوں سفارتی طور اتے کلا (تنہا) قرار دین والیاں دا بیانیہ غلط ثابت ہو چکا اے تے کلے پن دا خواب دیکھن والیاں نوں رسوائی دا سامنا اے، جدکہ اج عالمی سطح اتے پاکستان نوں امن، استحکام تے مثبت کردار دی علامت دے طور اتے دیکھیا جا رہا اے۔ نائب وزیراعظم نے آکھیا کہ اللہ تعالیٰ نے پاکستان نوں دنیا وچ وکھرا مقام دتا اے تے ہن وقت آ گیا اے کہ ملک نوں معاشی قوت بنایا جائے۔

اوہناں نے آکھیا کہ موجودہ حکومت نے خراب معاشی صورتحال اتے قابو پاون لئی اقدامات کیتے نیں، معیشت دوبارہ استحکام ول ودھ رہی اے تے بجٹ وچ تنخواہ دار طبقے تے تاجروں نوں ریلیف دتا گیا اے۔

ایس توں پہلے نائب وزیراعظم تے وزیر خارجہ محمد اسحاق ڈار نے حضرت علی بن عثمان ہجویری المعروف داتا گنج بخشؒ دے مزار نوں عرقِ گلاب نال غسل دتا تے چادر پوشی کیتی، پاکستان دی سلامتی، استحکام، ترقی، خوشحالی، قومی یکجہتی تے امتِ مسلمہ دی فلاح و بہبود لئی خاص دعاواں کیتیاں۔

غسل دی تقریب وچ صوبائی وزراء چودھری شافع حسین، بلال یاسین، خواجہ سلمان رفیق تے معاون خصوصی وزیر اعلیٰ پنجاب علی ڈار نے شرکت کیتی۔ تقریب وچ علماء تے مشائخ سمیت پورے ملک توں آئے زائرین نے وی شرکت کیتی جدکہ مشہور نعت خوانوں نے بارگاہِ رسالت وچ گلہائے عقیدت دے نذرانے پیش کیتے۔

اسحاق ڈار نے تقریب نوں خطاب کردیاں آکھیا کہ حضرت علی بن عثمان الہجویریؒ، المعروف حضرت داتا گنج بخشؒ دی ابدی صوفیانہ تعلیمات تے افکار امن، رواداری، بھائی چارے، محبتِ انسانیت تے روحانی روشنی دا عالمگیر پیغام دیندے نیں ۔ اسحاق ڈار نے داتا دربار دی مذہبیہ کمیٹی روم وچ قائم خاص فوٹوگرافک گیلری دا افتتاح وی کیتا۔