ترکیہ بجلی دے شعبے وچ اصلاحات لیاؤن وچ پاکستان دی مدد کرے گا : 3 مفاہمتی یادداشتاں تے دستخط
وفاقی وزیر اویس لغاری تے مشیر نجکاری محمد علی دی استنبول وچ توانائی اجلاس وچ شرکت، ریگولیٹری مہارت، گورننس تے نجکاری دے چنگے طریقیاں دے تبادلے تے اتفاق؛ پاور ڈویژن دا ترکیہ وچ روڈ شو، آئیسکو، گیپکو، فیسکو سمیت ڈسکوز دی نجکاری، پاور ٹرانسمیشن سسٹم تے سمارٹ میٹر رول آؤٹ پروگرام وچ سرمایہ کاری لئی موقعے متعارف
اسلام آباد (مانیٹرنگ ڈیسک، نامہ نگار) پاکستان تے ترکیہ نے توانائی دے شعبے وچ تعاون ودھاؤن تے اتفاق کیتا اے، ترکیہ پاکستان وچ اصلاحات لئی مدد کرے گا۔ استنبول وچ توانائی بارے اجلاس وچ وزیر توانائی اویس لغاری تے مشیر نجکاری محمد علی نے شرکت کیتی۔ پاکستان تے ترکیہ دے وچکار تعاون لئی 3 مفاہمتی یادداشتاں تے دستخط کیتے گئے۔ ترکیہ توانائی دے شعبے دیاں اصلاحات وچ تکنیکی مدد تے نجکاری و بجلی دی ونڈ (تقسیم) دے شعبے وچ اپنے تجربے شیئر کرے گا۔ دوہاں دیساں نے ریگولیٹری مہارت، گورننس تے نجکاری دے چنگے طریقیاں دے تبادلے تے اتفاق کیتا، پاکستان دے پاور سیکٹر دی مالی پائیداری تے کارکردگی نوں بہتر بناؤن لئی تعاون ودھاؤن دا فیصلہ کیتا گیا۔
ایم او یوز (MOUs) وچ نجکاری توں بعد گورننس فریم ورک، بجلی دی مارکیٹ دی ترقی تے مددگار خزمتاں دے ضوابط، پاور سسٹم آپریشنز تے ٹرانسمیشن دی منصوبہ بندی، بجلی دی ونڈ دے شعبے دے انتظام تے ڈیجیٹلائزیشن تے تعاون کیتا جائے گا۔ اویس لغاری نے آکھیا کہ پاکستان ترکیہ دے بجلی مارکیٹ اصلاحات دے تجربیاں توں فائدہ چکے گا۔
دوجے پاسے پاور ڈویژن نے استنبول وچ روڈ شو کیتا جس وچ پاور سیکٹر وچ سرمایہ کاری دے انقلابی موقعیاں دا پورٹ فولیو پیش کیتا گیا، جس وچ ڈسکوز دی نجکاری، پاور ٹرانسمیشن سسٹم تے سمارٹ میٹر رول آؤٹ پروگرام شامل نیں۔ آئیسکو، گیپکو تے فیسکو دی نجکاری لئی سرمایہ کاری دے موقعے وی پیش کیتے گئے۔
