بھارت: مندر آؤن والی نویں ویاہی کڑی باندراں نوں پھل کھواندے ہوئے پہاڑی توں ڈِگ کے ہلاک

بھارت وِچ اک نویں جوڑے نوں باندراں نوں کھانا کھوانا مہنگا پے گیا۔

بھارتی میڈیا دے مطابق ایہ واقعہ ریاست تامل ناڈو وِچ پیش آیا جِتھے اک 24 سالہ نویں نویلی لاڑی پہاڑی توں ڈِگ پئی۔

میڈیا رپورٹاں وِچ دَسیا گیا اے کہ ہلاک ہون والی زنانی دی سنہان٘د (شناخت) انیتا دے ناں توں ہوئی جیہدی پچھلے مہینے ہی 29 سالہ سریش نال شادی ہوئی سی۔

سریش باہرلے ملک نوکری کردا اے جہڑا حال ہی وِچ گھر مڑیا سی، جس توں بعد جوڑے نے مقامی مندر وِچ مذہبی رسماں پوریاں کیتیاں۔

مندر وِچ پوجا کرن توں بعد جوڑا پہاڑی دی چوٹی تے موجود باندراں نوں پھل کھوا رہا سی کہ اچانک کئی باندر کٹھے ہو گئے، جیہدے ڈر توں انیتا گھبرا گئی تے اپنا توازن گوا بیٹھی جس پاروں اوہ کھائی وِچ جا ڈِگی۔

میڈیا رپورٹاں دے مطابق کھائی وِچ ڈِگن پاروں زنانی موقعے تے ہی ہلاک ہو گئی۔