پنجاب وچ بلدیاتی الیکشن 2 توں 3 مہینیاں وچ متوقع نیں: عظمیٰ بخاری
لوکاں نوں جلدی پٹرول ہور سستا ہون دی خوشخبری ملن والی اے: میڈیا نال گل بات؛ وزیر اطلاعات دا فیصل آباد ڈویژن دا دورہ، عاشورہ دے پربندھاں (انتظامات) دا تفصیلی جائزہ لیا
لاہور، کمالیہ، فیصل آباد (سٹاف رپورٹر، نمائندہ خصوصی، خصوصی رپورٹر) وزیر اطلاعات پنجاب عظمیٰ بخاری نے آکھیا اے کہ پنجاب وچ بلدیاتی الیکشن آؤن والے دو توں تن مہینیاں وچ متوقع نیں، لوکاں نوں جلدی پٹرول ہور سستا ہون دی خوشخبری ملن والی اے، حکومت عوام نوں زیادہ توں زیادہ ریلیف دین لئی عملی قدم چُک رہی اے۔ انہوں نے کمالیہ دے نیڑے پنڈ (قصبے) خورشید آباد وچ محرم الحرام لئی سکیورٹی دے پربندھ چیک کرن توں بعد میڈیا نال گل بات کردیاں آکھیا کہ سیاسی کارکن بلدیاتی الیکشن دی تیاری شروع کرن تے نچلی پدھر (سطح) تے جمہوری عمل نوں مضبوط بناؤن وچ اپنا کردار ادا کرن۔
محرم الحرام دے پربندھاں بارے عظمیٰ بخاری نے آکھیا کہ پنجاب حکومت عزاداراں نوں بہترین سہولتاں تے سکیورٹی دین لئی بھرپور کم کر رہی اے۔ عظمیٰ بخاری نے مشیر وزیراعلیٰ پنجاب ذیشان ملک دے نال فیصل آباد ڈویژن دے وکھ وکھ ضلعیاں دا دورہ کیتا تے محرم الحرام خاص طور تے عاشورہ دے موقعے تے مجالس، جلوساں تے اوہناں دے روٹاں تے کیتے جان والے پربندھاں دا تفصیلی جائزہ لیا۔
دورے دے دوران عظمیٰ بخاری نے فیصل آباد سٹی، ٹوبہ ٹیک سنگھ، کمالیہ تے پیرمحل وچ وکھ وکھ امام بارگاہواں، مجالس تے جلوساں دیاں تھاواں دا معائنہ کیتا۔ انہوں نے مجالس دے منتظمین تے عزاداراں نال ملاقات کیتی تے اوہناں توں پربندھاں، سہولتاں تے دوجے انتظامی کماں بارے پچھیا۔ عظمیٰ بخاری نے کمالیہ وچ پرانی امام بارگاہ دا وی دورہ کیتا تے اوتھے جاری پربندھاں دا جائزہ لیا۔ انہوں نے مجلس وچ آئیاں سوانیاں (خواتین) نال وی ملاقات تے گل بات کیتی۔
