“عمران نال ملاقات نہ ہون تے دوبارہ احتجاج دا راہ اپناواں گے: سہیل آفریدی”
وزیراعلیٰ سہیل آفریدی نے آکھیا اے کہ، بانی پی ٹی آئی عمران خان نال ملاقات نہ ہون تے اوہ احتجاج دا راہ اپناون گے۔ پشاور وچ پلوسی اتے مسنگ لنک روڈ فلائی اوور دی افتتاحی تقریب نال خطاب کردیاں اوہناں آکھیا کہ، حکومت نے ہمیشہ عوام دی خدمت نوں پہل دتی اے، ایسے لئی عوام نے اوہناں نوں تریجی واری حکومت دا موقع دتا اے۔ صوبے وچ ہر ہفتے ترقیاتی کماں دا افتتاح ہو رہیا اے، عظمت دی بحالی لئی 200 ارب روپے جاری کیتے گئے نے اتے موجودہ منصوبے پورے ہون توں بعد ہور 200 ارب روپے دتے جان گے۔
اوہناں آکھیا کہ خیبرپختونخوا نے دہشت گردی دے خلاف جان تے مال دی بے مثال قربانی دتی، پر بند کمریاں وچ کیتے گئے غلط فیسلیاں پاروں دہشت گردی دوبارہ لوٹ آئی اے۔ ضم ہوئے ضلعیاں وچ بدامنی ریاست دی ناکام پالیسیاں دا نتیجہ اے اتے خیبرپختونخوا نوں لیبارٹری بنا کے نویاں پالیسیاں آزمائیاں جاندیاں رہیاں، پر ہن اے پالیسیاں بدلن گیاں اتے 2026-27 صوبے وچ امن تے ترقی دا سال ثابت ہووے گا۔
سیاسی حالات تے گل کردیاں اوہناں آکھیا کہ، بانی چیئرمین نال ملاقات لئی سپریم کورٹ دے چیف جسٹس، اسلام آباد ہائی کورٹ دے لارجر بینچ اتے دوجے اداریاں نال رابطہ کیتا گیا، پر سارے آئینی تے قانونی راستے ورتن دے باوجود ملاقات ممکن نہیں ہو سکی اتے نہ ہی کیسز دی سماعت ہو رہی اے۔
سہیل آفریدی نے واضح کیتا کہ، احتجاج اوہناں دی خواہش نہیں بلکہ آخری آپشن اے، جے سارے قانونی راہ بند کر دتے جان تاں احتجاج ہر شہری دا آئینی حق بن جاندا اے۔ 26 نومبر نوں ورکرز نوں شہید کیتا گیا، پر اوہ پچھے نہیں ہٹے، اتے جے دوبارہ احتجاج کرنا پیا تاں میں خود اگوائی کراں گا اتے پہلی گولی میرے سینے تے لگے گی۔
