“سندھ اسمبلی: 3.562 کھرب دا بجٹ منظور، اپوزیشن دیاں 1600 کٹوتی دیاں تحاریک مسترد”
سندھ اسمبلی نے اتوار دی رات مالی سال 2026-27 لئی 3.562 کھرب روپے دا بجٹ منظور کر لیا اے، اتے ایہدے نال ہی 165 ارب روپے دی ضمنی گرانٹس دی وی منظوری دے دتی اے۔ بجٹ اجلاس دوران ایوان نے اپوزیشن ولوں پیش کیتیاں گئیاں 1,600 کٹوتی دیاں تحاریک نوں مسترد کر دتا۔ صوبائی اسمبلی نے فنانس بل وی منظور کیتا، جیدے تحت کوئی نواں ٹیکس نہیں لایا گیا بلکہ پرانے ٹیکساں نوں ہی بہتر کیتا گیا اے۔
اپوزیشن ولوں نیشنل گیمز اتے ‘میرا لیاری’ فلم لئی فنڈز تے اعتراض کیتے گئے سن، پر وزیراعلیٰ مراد علی شاہ نے اوہناں دی مخالفت کردیاں آکھیا کہ سندھ پہلا صوبہ اے جینے فلم بنا کے صوبے دا چنگا چہرہ ساہمنیں آندا اے۔ ایم کیو ایم دے رکن صابر قائمخانی ولوں زرعی آمدن تے سپر ٹیکس لاءن دی ترمیم وی مسترد کر دتی گئی، کیونکہ وزیراعلیٰ دا کہنا سی کہ زمیں داراں دی اینی آمدن نہیں ہوندی۔
🏗️ کراچی لئی 206 ارب روپے اتے 1800 ترقیاتی سکیماں دا اعلان
بجٹ دی منظوری توں بعد وزیراعلیٰ مراد علی شاہ نے آکھیا کہ اے بجٹ محتاط مالی انتظام، صحت، تعلیم اتے زراعت وچ وڈیاں کامیابیاں دا آئیندار اے۔ اوہناں دسا کہ 344 ارب روپے دے بجٹ خسارے اتے وفاق ولوں فنڈز دی کمی دے باوجود، حکومت نے 100 وڈے ترقیاتی منصوبے پورے کیتے اتے سندھ دی تریخ وچ پہلی واری کنک (گندم) وچ خود کفالت حاصل کیتی۔
وزیراعلیٰ نے نویں سال لئی 720 ارب روپے دے سالانہ ترقیاتی پروگرام دا اعلان کیتا، جیدے وچوں کراچی لئی 206 ارب روپے مختص کیتے گئے نے۔ اوہناں عزم ظاہر کیتا کہ پورے صوبے وچ 1800 توں وڈھ ترقیاتی سکیماں پوریاں کیتیاں جان گئیاں۔ اوہناں آکھیا کہ انتظامی اخراجات وچ 62 ارب روپے دی کمی کر کے اے پیسہ عوام دی بھلائی لئی رکھیا گیا اے۔
🏛️ صوبے دے حقوق دا دفاع کراں گے، تقسیم دی سیاست نہ کیتی جاوے
مراد علی شاہ نے آکھیا کہ اوہ وفاق وچ سندھ دے کردار نوں منواؤن گے اتے صوبے دے آئینی تے مالی حقوق دا بھرپور دفاع کرن گے۔ اوہناں سیاسی لیڈراں نوں آکھیا کہ اوہ ملک وچ تقسیم دی سیاست توں پرہیز کرن۔
اپوزیشن دے اعتراضاں دا جواب دیندیاں اوہناں آکھیا کہ اے تاثر غلط اے کہ معیاری علاج صرف کراچی وچ اے، بلکہ گمبٹ، سکھر اتے حیدرآباد دے ہسپتالاں وچ وی وڈیاں سہولتاں موجود نے۔ اوہناں کراچی دی ترقی لئی 1.7 کھرب روپے دے وڈے پروگرام دا اعادہ کیتا اتے آکھیا کہ وفاقی حکومت دا تعاون صرف کجھ سڑکاں تک محدود اے۔ آخر وچ اوہناں سندھ سالڈ ویسٹ مینجمنٹ بورڈ تے کرپشن دے الزاماں نوں چیلنج کیتا اتے 40 ارب روپے دے رمضان پیکیج دی تنقید نوں وی حقائق دے خلاف قرار دتا۔
