190 ملین پاؤنڈ کیس: عمران تے بشریٰ بی بی نے فیصلہ چیلنج کر دتا، سزا معطلی دی درخواست
اسلام آباد: عمران خان تے بشریٰ بی بی نے 190 ملین پاؤنڈ کیس دا فیصلہ سپریم کورٹ وچ چیلنج کر دتا۔
بانی پی ٹی آئی عمران خان تے بشریٰ بی بی نے اسلام آباد ہائیکورٹ دا فیصلہ چیلنج کردیاں ہویاں سزا معطلی لئی سپریم کورٹ نال رجوع کیتا اے۔ اسلام آباد ہائیکورٹ نے عمران خان تے بشریٰ بی بی دی سزا معطلی دیاں اپیلاں خارج کیتیاں سن۔
عمران خان تے بشریٰ بی بی ولوں دائر درخواستاں وچ آکھیا گیا اے کہ سزا معطلی دی درخواست مسترد کرنا انصاف دے تقاضیاں دے خلاف سی، درخواست قابلِ سماعت من کے وی کیس دے نکتیاں نوں نظرانداز کیتا گیا، قید دے دوران نظر (بینائی) دا عارضہ لاحق ہویا، علاج لئی جیل توں باہر منتقل کیتا گیا۔
درخواست وچ آکھیا گیا اے کہ بانی پی ٹی آئی تے اوہناں دی گھر والی (اہلیہ) نوں شدید صحت دے مسئلیاں دے باوجود رہائی نہ دینا ناانصافی اے، کلہیاں (تنہائی وچ) قید رہن پاروں دوہاں نوں غیرمعمولی ذہنی اذیت دا سامنا کرنا پیا، سزا معطلی دی درخواست جان بجھ کے مؤخر کیتی جاندی رہی، ٹرائل دے دوران ضمانت مل چکی سی، الزام بے بنیاد قرار دتے گئے سن۔
سپریم کورٹ وچ دائر درخواست وچ آکھیا گیا اے کہ سزا معطلی اُتے فیصلہ کردیاں ہویاں مقدمے دے نکتیاں نوں دیکھنا قانونی طور اُتے ممکن اے، شواہد دا ابتدائی جائزہ لئے بغیر درخواست مسترد کرنا غلط سی، نیب نے بار بار التواء لے کے اپیل نوں لمبا کیتا تے انصاف وچ تاخیر پیدا کیتی۔
پی ٹی آئی ولوں دائر درخواست وچ مؤقف اختیار کیتا گیا اے کہ عمران خان تے بشریٰ بی بی دی گرفتاری دا طریقہ کار غیر قانونی تے غیر ذمہ دارانہ سی، غیرقانونی گرفتاری اُتے اعلیٰ عدالت نے رہائی دا حکم دتا سی، احتساب دے ناں اُتے سیاسی بنیاداں اُتے کارروائی کیتی گئی، نیب قوانین وچ ترمیم نال حتمی اپیل آئینی عدالت نوں سنن دا اختیار دتا گیا۔
درخواست وچ آکھیا گیا اے کہ اپیل وچ آئینی عدالت جان دا ذکر موجود نہیں، سزا معطلی دی اپیل سپریم کورٹ وچ ای قابلِ سماعت اے، ہائیکورٹ دا حکم کالعدم قرار دے کے سزا معطل کیتی جاوے تے رہائی دا حکم دتا جاوے۔
