‘میرا تعلق افغانستان توں اے تے اوتھوں ای ٹریننگ لئی’، کراچی وچ رینجرز کیمپ اُتے حملے وچ گرفتار دہشتگرد دے انکشافات

کراچی وچ سندھ رینجرز دے کیمپ اُتے حملے وچ ملوث دہشت گرد تنظیم جماعت الاحرار دے گرفتار زخمی دہشت گرد نے اعتراف کیتا اے کہ اوہ افغانستان دے علاقے جلال آباد توں آیا اے۔

گرفتار دہشت گرد نے دَسیا کہ اوہدا ناں عثمان علی اے تے اوہدے نال 3 ہور ساتھی وی سن جیہناں دے ناں عبدالہادی، جانان تے عمر فاروق سن۔

گرفتار دہشت گرد نے دَسیا کہ دہشت گرد جانان نے پاکستان رینجرز دے کیمپ اُتے بم سٹیا سی۔

اوہدا کہنا سی کہ اسیں لوک ست دن پہلے پاکستان وچ باجوڑ دے رہائشی عبدالہادی دے کول آئے ساں، دہشت گرد عبدالہادی ماریا جا چکیا اے۔

گرفتار دہشت گرد نے دَسیا کہ سانوں اک زیرِ تعمیر عمارت وچ رکھیا گیا سی، حملے وچ استعمال ہون والا اسلحہ عبدالہادی وزیرستان توں لے کے آیا سی، میں جدوں بھج رہیا ساں تے مینوں گولی لگ گئی تے میں اوتھے ای ڈگ پیا۔

گرفتار دہشت گرد نے انکشاف کیتا کہ اوہدا تعلق جماعت الاحرار نال اے جیہدے افغانستان وچ کمانڈر دا ناں احرار مولوی اے، سانوں ساریاں نوں افغانستان وچ تربیت دتی گئی سی، اسیں سارے خودکش جیکٹ تیار کر لیندے آں، افغانستان وچ پہلے توں تربیت دتی گئی سی، افغانستان وچ خودکش جیکٹ تے دوجی ٹریننگ عمر قاری نے دتی سی، کراچی آؤن توں پہلے ساڈے لئی افغانستان توں سارے انتظام ہو گئے سن۔

دہشت گرد عثمان دے مطابق عبدالہادی سب جاندا سی، اوہ پہلے وی ایتھے آیا سی، پہلے سانوں فوج تے رینجرز وچ فرق معلوم نہیں سی، ایتھے آ کے رینجرز توں واقف ہوئے تے سانوں دَسیا گیا کہ اے سارے کافر نیں۔

دہشت گرد دے بیان اُتے دفاعی تے سکیورٹی ماہرین دا کہنا اے کہ دہشت گرد دے اے اعترافات اس گل ول اشارہ کردے نیں کہ عبوری افغان طالبان حکومت دے دور وچ افغانستان دی دھرتی ایسے دہشت گرد عنصراں دی پناہ گاہ دے طور تے استعمال ہو رہی اے جیہڑے پاکستان دے خلاف حملیاں وچ ملوث نیں۔

تزویراتی امور دے ماہرین دا کہنا اے کہ پاکستان کئی موقعیاں اُتے افغان طالبان انتظامیہ نوں سرحد پار دہشت گردی دے بارے وچ پکے تے ناقابلِ تردید ثبوت پیش کر چکیا اے، پر افغان طالبان رجیم ولوں اس سلسلے وچ کوئی اثر دار عملی قدم سہمنے نہیں آیا۔