اسرائیل دا ای ون منصوبہ فلسطینی ریاست دے جغرافیائی تسلسل لئی سنگین خطرہ اے: پاکستان
نیویارک: اقوام متحدہ وچ پاکستان دے مستقل مندوب عاصم افتخار نے واضح کیتا اے کہ اسرائیل دا نویاں بستیاں دی تعمیر دا ای ون منصوبہ فلسطینی ریاست دے جغرافیائی تسلسل لئی سنگین خطرہ اے۔
سلامتی کونسل وچ خطاب کردیاں عاصم افتخار دا کہنا سی کہ مقبوضہ فلسطینی علاقیاں وچ صورتحال مسلسل وگڑ رہی اے، فلسطینی علاقیاں وچ بین الاقوامی قانون دیاں سنگین خلاف ورزیاں جاری نیں، سلامتی کونسل دے ارکان وچ صورتحال تے تشویش تے احتساب دے مطالبات سامنے آئے نیں۔
پاکستانی مندوب عاصم افتخار نے آکھیا کہ مغربی کنارے وچ اسرائیلی آباد کاری دا پھیلاؤ ودھ رہا اے، اسرائیلی آبادکاراں دے تشدد دی پدھر ہن تک دی سب توں اچی پدھر تے اپڑ چکی اے، ای ون منصوبہ فلسطینی ریاست دے جغرافیائی تسلسل لئی سنگین خطرہ اے۔
اوہناں نے آکھیا کہ سیکرٹری جنرل دی رپورٹ دے مطابق مقبوضہ فلسطینی علاقیاں وچ 4 ہزار 750 رہائشی یونٹس دی منظوری تشویشناک رجحان اے، اے ای ون منصوبہ دو ریاستی حل لئی وڈا چیلنج اے۔
اوہناں دا ہور کہنا سی کہ فلسطینی اتھارٹی دی مالی رقماں دی بندش فلسطینی اداریاں نوں کمزور تے حکمرانی نوں مفلوج کرن دی کوشش اے۔
یاد رہے کہ پچھلے سال اسرائیل نے فلسطینی ریاست نوں بنن توں روکن لئی نویں منصوبے دی منظوری دتی سی۔ اس منصوبے دے تحت مغربی کنارے تے یروشلم دے وچکار 3401 گھر اسرائیلی آباد کاراں لئی تعمیر کیتے جان گے۔
