بلوچستان نال تعاون جاری رہے گا، اسحاق ڈار، ایاز صادق
نائب وزیر اعظم، سپیکر قومی اسمبلی نال بلوچستان دے وفد دی ملاقات، وکھو وکھ معاملیاں اُتے گل بات
اسلام آباد (نامہ نگار) نائب وزیر اعظم تے وزیر خارجہ سینیٹر اسحاق ڈار تے سپیکر قومی اسمبلی سردار ایاز صادق نال بلوچستان اسمبلی دے پارلیمانی لیڈراں تے ممبراں اُتے مشتمل اک وفد نے ملاقات کیتی جس وچ بلوچستان وچ امن و امان دی مجموعی صورتحال، جاری ترقیاتی منصوبیاں، وفاق تے بلوچستان دے وچکار تعاون دے معاملیاں اُتے وچار وٹاندرا کیتا گیا۔
ایس موقعے اُتے سینیٹر اسحاق ڈار تے سردار ایاز صادق نے آکھیا کہ بلوچستان دی ترقی، امن و استحکام، لوکاں دی خوشحالی تے بہتر طرزِ حکمرانی لئی وفاق تے صوبے دے وچکار تگڑا رابطہ تے باہمی تعاون بہت ضروری اے۔ وفاقی حکومت بلوچستان دی پائیدار ترقی تے عوامی بھلائی لئی ہر ممکن تعاون جاری رکھے گی۔
وفد نے وفاقی حکومت دیاں کوششاں نوں سراہیا تے وزیر اعظم شہباز شریف، نائب وزیر اعظم اسحاق ڈار تے فیلڈ مارشل سید عاصم منیر دیاں سفارتی کوششاں دی تعریف کیتی۔ ایس موقعے اُتے گورنر بلوچستان جعفر مندوخیل، وزیر اعلیٰ بلوچستان سرفراز احمد بگٹی، سپیکر بلوچستان اسمبلی عبدالخالق خان اچکزئی، ممبر قومی اسمبلی جمال شاہ کاکڑ، صوبائی وزیر نور محمد دمڑ، راحیلہ حمید خان درانی، میر محمد عاصم کرد گیلو، برکت علی رند، نوابزادہ محمد زرین خان مگسی، محمد خان لہڑی، زرک خان، اشوک کمار، ڈاکٹر ربابہ، ہادیہ نواز تے محمد خان طور بھی موجود سن۔
