بچپن وچ وچھڑ جان والا بندہ 35 ورھیاں (سالاں) بعد اپنے ٹبر (خاندان) نال ملن وچ کامیاب
بچپن وچ بیلیان (دوستاں) نال ریل گاڑی (ٹرین) وچ لُکن میٹی (چھپن چھپائی) کھیڈدیاں اپنے ٹبر توں وچھڑ جان والا بندہ 35 ورھیاں بعد مڑ (دوبارہ) اوہناں نال ملن وچ کامیاب ہو گیا اے۔
لائی زی چنگ جمن توں ہی ڈورے (بہرے) نیں تے ایس پاروں اوہناں وچ بولن دی سکت (صلاحیت) وی نہیں اے۔
1991 وچ لائی زی اپنے بیلیاں (دوستاں) نال کھیڈدیاں اک ریل گاڑی (ٹرین) وچ لُک گئے سن تے اک سیٹ دے تھلے سوں گئے، تے اوہناں دی اکھ اک انجان تھاں (اجنبی مقام) تے کھلی۔
لوکاں نال گل بات نہ کر سکن پاروں لائی زی کچھ چر تک شینزن ریلوے اسٹیشن دے نیڑے اک بے گھر بال (بچے) دے طور تے رہے۔
بھاگاں نال (خوش قسمتی سے) اوہناں نوں اک مائی (خاتون) ملی جنہاں نے اوہنووں لکھنا سکھایا۔
5 ورھیاں بعد اوہ مائی ہانگ کانگ چلی گئی پر لائی زی مڑ (دوبارہ) بے گھر نہ ہوئے بلکہ ریلوے اسٹیشن دے نیڑے اک ہوٹل (ریسٹورنٹ) دے مالک نے اوہنووں کھان، سون تے نوکری وغیرہ دی پیشکش کیتی۔
ہونگ شینگ شیان نامی بندہ لائی زی نوں کافی چِر توں اوس علاقے وچ ویکھ رہا سی تے اوہنووں اوہدے گھر اپڑانا چاہندا سی۔
ہونگ شینگ نے لائی زی نوں ہوٹل دے بھورے (تہہ خانے) وچ رہن دی اجازت دتی جدکہ مفت کھانا وی دتا۔
بھاویں 2 ورھیاں بعد ہونگ دا ہوٹل بند ہو گیا پر اوہناں نے لائی زی نوں اک تھاں تے چوکیدار (سکیورٹی گارڈ) دی نوکری لوا دتی جدکہ مقامی ہوٹلاں ولوں لائی زی نوں مفت کھانا ملدا رہا۔
پیسے دھروں (مالی طور پر) ہونگ شینگ دے حالات کافی ماڑے (خراب) سن جدکہ اوہناں دے 2 بال وی سن پر اوہ تے اوہناں دی ٹبری (اہلیہ) 3 دہاکیاں تک لائی زی دا خیال رکھدے رہے۔
ہونگ شینگ تے اوہناں دی ٹبری نے لائی زی نوں پڑھایا لکھایا وی تاں جے ڈورے پن دی وجہ توں اوہنووں اوکھیاؤن (مشکلات) دا سامنا نہ کرنا پوے۔
اوہ لائی زی نوں اپنے گھر لے گئے تے اوہنووں پیسے بچاؤن دی متّ (مشورہ) وی دتی تاں جے اوہ اپنے وچھڑے ہوئے ٹبر نال مڑ مل سکے۔
لائی زی ہونگ شینگ نوں اپنے ماپے (والدین) آکھدیاں اوہناں دا شکرانہ کردے نیں۔
لائی زی نے اپنے ٹبر دی بھال (تلاش) لئی کدی ہمت نہیں ہاری تے آن لائن ایس بارے اپنے سنیاہے (پیغامات) شیئر کیتے، جدکہ کچھ ورھے پہلے ریل گاڑی راہیں وکھو وکھ صوبیاں دا سفر وی کیتا۔
ہونگ لائی زی نوں تھانے (پولیس اسٹیشن) وی لے کے گئے جدکہ مقامی اخباراں وچ اشتہار وی چھپوائے۔
لائی زی اپنے ٹبر نال ایس لئی ملن وچ کامیاب ہوئے کیوں جے اوہناں دے گھر والیاں نے وی کدی اوہدی بھال دا سلسلہ روکیا نہیں سی۔
لائی زی دے وڈے بھرا لائی زیو (اوہ وی ڈورے نیں) اک سوشل میڈیا ایپ دے کئی چیٹ گروپاں دے ممبر نیں تے اچیتی (اتفاقاً) اوہناں نے اپنے چھوٹے بھرا دی اک چٹھی (میسج) ویکھی۔
لائی زی بچپن توں اپنا ناں پُٹھا لکھن دے عادی نیں تے ایس توں لائی زیو نوں اوہنووں پچھانن وچ کوئی اوکھ نہیں ہوئی۔
ایہدے توں بعد دوویں بھرا آن لائن کئی وار ملے تے ہونگ دی مدد نال لائی زی دا ڈی این اے ٹیسٹ وی ہویا۔
پر ڈی این اے ٹیسٹ دے نتیجے توں پہلے ہی اے ٹبر شینزن اپڑ گیا جِتھے ڈی این اے نے رشتے دی تصدیق کر دتی۔
لائی زی دے ٹبر نے ہونگ تے اوہناں دی ٹبری دا شکرانہ کیتا جنہاں نے اوہدا اینا چنگا خیال رکھیا۔
لائی زی اپنے اصل ٹبر دے نال نال شینزن والے ‘ماپیاں’ دا خیال رکھن دا وی قول (عہد) کر چکے نیں۔
