ایچ نائن ہفتہ وار بازار آتشزدگی دی فرانزک تحقیقات دا فیصلہ

## نیشنل فرانزک ایجنسی دا دورہ جائے حادثہ، شواہد اکٹھے کر کے لیبارٹری ارسال؛ تحقیقاتی کمیٹی نے وی حفاظتی انتظامات وچ خامیاں بارے معلومات جمع کر لئیاں

اسلام آباد (خصوصی رپورٹر)

سی ڈی اے دے ایچ نائن ہفتہ وار بازار وچ پچھلے ہفتے لگن والی آتشزدگی دے واقعے اُتے پہلی واری فرانزک تحقیقات شروع کرن دا فیصلہ کیتا گیا اے۔ ضلعی انتظامیہ نے اگ دی حقیقی وجہ معلوم کرن لئی تحقیقاتی کمیٹی دے ذریعے فرانزک تجزیہ کراؤن دا فیصلہ کیتا اے، ایس سلسلے وچ نیشنل فرانزک ایجنسی دیاں ٹیماں نے جائے حادثہ دا دورہ کر کے شواہد اکٹھے کر لئے نیں۔

واقعے توں بعد ضلعی انتظامیہ نے تحقیقات لئی 8 رکنی کمیٹی بنائی سی جس دی درخواست اُتے نیشنل فرانزک ایجنسی دے ماہرین نے موقعے اُتے پہنچ کے جلے ہوئے سٹالز تے ملبے توں وکھو وکھ نمونے اکٹھے کیتے، جنہاں نوں ہور جانچ لئی لیبارٹری بھجوا دتا گیا اے۔

واضح رہے کہ ایچ نائن بازار وچ اگ لگن دے نتیجے وچ سینکڑاں دکاناں تے سٹالز جل کے سواہ (خاکستر) ہو گئے سن۔ ضلعی انتظامیہ دا کہنا اے کہ فرانزک رپورٹ آؤن توں بعد متاثرین نوں معاوضے دی ونڈ لئی باقاعدہ طریقہ کار اپنایا جائے گا۔

ذرائع دا کہنا اے کہ تحقیقاتی کمیٹی نے ریسکیو دے کم وچ پیش آؤن والی رکاوٹاں تے حفاظتی انتظامات وچ خامیاں دے بارے وچ وی معلومات جمع کر لئیاں نیں، جنہاں نوں فرانزک رپورٹ دے نال جوڑ کے حتمی سفارشات تیار کیتیاں جان گیاں۔