ڈولفن فورس دیاں 6 مہینیاں وِچ کاروائیاں، 160 توں ودھ اشتہاری گرفتار، ناجائز اسلحہ برآمد
پٹرولنگ، ناکہ بندی، سنیپ چیکنگ تے انٹیلی جنس بیسڈ کاروائیاں نوں ہور مؤثر بنایا گیا، منشیات فروشاں دے خلاف کاروائیاں وِچ 800 توں ودھ ملزماں نوں گرفتار کیتا گیا، ون ویلنگ تے آتش بازی اُتے وی ایکشن
فیصل آباد (عبدالباسط توں) شہر وِچ جرائم دے خاتمے تے شھریاں دے جان و مال دے تحفظ لئی ڈولفن فورس نے پچھلے چھ مہینیاں دے دوران وکھ وکھ کاروائیاں وِچ 160 توں ودھ اشتہاری، 372 ریکارڈ یافتہ ملزماں تے 102 عدالتی مفروراں نوں گرفتار کر لیا، جدکہ منشیات فروشاں، ناجائز اسلحہ رکھن والیاں تے دوجے جرائم پیشہ عنصراں دے خلاف وی کریک ڈاؤن جاری رکھیا۔
ریجنل پولیس آفیسر سہیل اختر سکھیرا تے سٹی پولیس آفیسر تنویر حسین دیاں ہدایتاں اُتے ڈولفن فورس نوں ڈکیتی، چوری، راہزنی، اغوا، بھتہ خوری، تاوان تے دوجے سنگین جرائم دی روک تھام لئی خصوصی ٹاسک سونپے گئے۔ پٹرولنگ، ناکہ بندی، سنیپ چیکنگ تے انٹیلی جنس بیسڈ کاروائیاں نوں ہور مؤثر بنایا گیا۔
160 توں ودھ اشتہاری، 372 ریکارڈ یافتہ ملزماں تے 102 عدالتی مفرور گرفتار کیتے گئے، جدکہ ناجائز اسلحہ رکھن والے 120 توں ودھ بندیاں نوں گرفتار کر کے بھاری مقدار وِچ اسلحہ برآمد کیتا گیا۔ ڈولفن فورس نے منشیات فروشاں دے خلاف کاروائیاں وِچ 800 توں ودھ ملزماں نوں گرفتار کر کے اونہاں دے قبضے چوں وڈی مقدار وِچ منشیات برآمد کیتیاں، جدکہ ون ویلنگ، پتنگ بازی تے آتش بازی وِچ ملوث 150 توں ودھ بندیاں دے خلاف وی مقدمات درج کیتے گئے۔
چوری تے ڈکیتی دیاں وارداتاں وِچ ملوث 110 ملزماں نوں گرفتار کر کے اونہاں دے قبضے چوں لکھاں روپے مالیت دا چوری کیتا سامان برآمد کیتا گیا۔ پولیس دا کہنا اے کہ جرائم پیشہ عنصراں دے خلاف کاروائیاں اگے وی جاری رہن گئیاں۔
