منی لانڈرنگ ملکی معیشت تے چنگی حکمرانی لئی سنگین خطرہ، اداریاں تے عدلیہ وچ ہم آہنگی ضروری: چیئرمین

نیب مالیاتی جرائم نال نمٹن لئی پر عزم: نذیر احمد، عدلیہ دی تربیت تے استعداد کار وچ وادھا ناگزیر: جسٹس انعام امین تجارتی بنیاد تے منی لانڈرنگ، کرپٹو دے غلط استعمال، یو این انسدادِ بدعنوانی کنونشن تے ڈپٹی چیئرمین تے ہوراں دی بریفنگ

اسلام آباد (دنیا رپورٹ، اے پی پی) قومی احتساب بیورو (نیب) نے اسلام آباد دی ضلعی عدلیہ دے ججز لئی پاکستان اینٹی کرپشن اکیڈمی وچ انسدادِ منی لانڈرنگ، مقدماں دی تفتیش، قانونی چارہ جوئی تے عالمی ڈھانچے دے موضوع تے خصوصی تربیتی نشست کروائی۔ ایس تربیتی پروگرام دا مقصد اینٹی منی لانڈرنگ قنوناں دے موثر نفاذ، عدالتی استعداد کار وچ وادھے تے مالیاتی جرائم نال نمٹن لئی وکھ وکھ اداریاں دے وچکار تعاون نوں ودھاونا سی۔ اسلام آباد ہائیکورٹ دے جسٹس انعام امین منہاس تقریب دے مہمانِ خصوصی سن۔

چیئرمین قومی احتساب بیورو لیفٹیننٹ جنرل (ر) نذیر احمد نے اپنے افتتاحی خطاب وچ آکھیا کہ منی لانڈرنگ ملکی معیشت تے چنگی حکمرانی لئی سنگین خطرہ اے، جس نال نمٹن لئی تفتیش دے اداریاں، پراسیکیوٹرز، مالیاتی اداریاں تے عدلیہ دے وچکار موثر ہم آہنگی ضروری اے۔ اوہناں نے جدید مالیاتی جرائم دی روک تھام لئی پیشہ ورانہ مہارت تے جدید ٹیکنالوجی دے استعمال دے عزم دا اعادہ کیتا۔

اسلام آباد ہائیکورٹ دے جسٹس انعام امین منہاس نے اختتامی خطاب وچ ایس پروگرام نوں ویلے سر تے اہم قرار دیندے ہوئے آکھیا کہ جدید مالیاتی جرائم نال موثر انداز وچ نمٹن لئی عدلیہ دی مسلسل تربیت تے استعداد کار وچ وادھا ناگزیر اے۔

ایس توں پہلاں ڈپٹی چیئرمین نیب سہیل ناصر نے اینٹی منی لانڈرنگ ایکٹ 2010 دیاں وکھ وکھ شقاں، قنون نافذ کرن والے اداریاں دے کردار، تجارتی بنیاداں تے منی لانڈرنگ، شیل کمپنیاں تے کرپٹو کرنسی دے غلط استعمال ورگے موضوعات تے بریفنگ دتی۔ اوہناں نے منی لانڈرنگ توں بنائے گئے اثاثیاں دی ضبطی تے بحقِ سرکار ضبط کرن توں متعلق عدالتاں دے اختیارات تے وی چاننا پایا۔

نیب دے سپیشل انویسٹی گیشن ڈویژن دے ڈی جی محمد طاہر نے فنانشنل ایکشن ٹاسک فورس (فیٹف) تے اقوامِ متحدہ دے انسدادِ بدعنوانی کنونشن (یو این سی اے سی) دے تحت عالمی اینٹی منی لانڈرنگ فریم ورک، متوازی مالیاتی تحقیقات تے چوری کیتے گئے اثاثیاں دی واپسی لئی بین الاقوامی تعاون دے طریقہ کار تے اپنے خیا ل دا اظہار کیتا۔

فنانشل مانیٹرنگ یونٹ دی ماسٹر ٹرینر نور السحر نے پاکستان دے فنانشل انٹیلی جنس یونٹ دے کردار، مشکوک ٹرانزیکشن رپورٹس تے goAML پلیٹ فارم دی اہمیت تے بریفنگ دیندے ہوئے آکھیا کہ انٹیلی جنس تے مبنی تحقیقات کامیاب استغاثہ وچ اہم کردار ادا کردیاں نیں۔ تقریب دے آخر وچ ججاں وچ اسناد ونڈیاں گئیاں۔