قید دے ذاتی تجربات تے جیل وچ جدید اصلاحات متعارف کرواؤ: مریم نواز

جیل وچ میریاں چیخاں کسے نے نہیں سُنیاں، بیمار ماں نال ملاقات دی اجازت نہ ملی: جیل اصلاحات کانفرنس توں خطاب 6 ہور ضلعیاں وچ الیکٹرک بس شروع، دائرہ تحصیل تک ودھائینگے: وزیراعلیٰ، ریاست قراقلی پاقستان دے وفد دی ملاقات

اسلام آباد، لاہور (کورٹ رپورٹر، سٹاف رپورٹر، مانیٹرنگ ڈیسک) وزیراعلیٰ پنجاب مریم نواز شریف نے آکھیا اے کہ جیل وچ قیدِ تنہائی تے بنیادی سہولتاں توں محرومی دے ذاتی تجربات نے اوہناں نوں جیل اصلاحات دی لوڑ دا احساس کروایا، قیدِ تنہائی دے ذہنی اثراں دا خود تجربہ کیتا، جس توں بعد پنجاب دیاں جیلاں وچ جدید اصلاحات متعارف کروائیاں۔ دوجے پاسے اوہناں نے پنجاب دے مزید چھ ضلعیاں وچ الیکٹرک بس سروس دا افتتاح کر دتا تے اعلان کیتا کہ پنجاب بھر وچ الیکٹرک بساں دی تعداد مرحلہ وار ودھا کے 5 ہزار تک پہنچائی جائے گی جدکہ ہر ضلعے تے تحصیل تک جدید، ماحول دوست تے گھٹ خرچے والی پبلک ٹرانسپورٹ دتی جائے گی۔

اسلام آباد وچ جیل اصلاحات کانفرنس توں خطاب کردیاں وزیراعلیٰ نے آکھیا کہ میں ایس فورم تے کوئی سیاسی گل نہیں کرنا چاہندی، اڈیالہ جیل وچ اوہناں نوں 24، 24 گھنٹے قیدِ تنہائی وچ رکھیا گیا، جہاں اوہناں نے ذہنی دباؤ، طبی سہولتاں دی کمی، پرائیویسی دے فقدان تے ہور مشکلاں دا سامنا کیتا۔ جیل وچ میریاں چیخاں کسے نے نہیں سُنیاں، مینوں جیل جا کے احساس ہویا کہ بے بس قیدی کیویں محسوس کردا اے۔ مینوں جس سیل وچ رکھیا گیا اوہدے نال گھٹ عمر بچیاں دا سیل سی، سیل توں روز بچیاں دے چیخنے دیاں آوازاں آؤندیاں سن۔ اوہناں نے دسیا کہ اک موقعے تے شوگر گھٹ ہون دے باوجود مدد لئی کوئی موجود نہ سی جدکہ بیمار ماں نال ملاقات دی وی اجازت نہیں دتی گئی۔

اوہناں دا کہنا سی کہ جیل دی تکلیف اوہی سمجھ سکدا اے جس تے ایہہ ویلا لنگھدا اے، اسے لئی پنجاب دیاں جیلاں وچ قیدیاں لئی ویڈیو لنک، ایمرجنسی بٹن تے ہور جدید سہولتاں دتیاں گئیاں نیں تاکہ اوہناں نوں باوقار تے بہتر ماحول مل سکے۔ خطاب توں پہلاں مریم نواز نے پنجاب وچ جیل اصلاحات توں متعلق ڈاکومنٹری چلوائی۔

دوجے پاسے، پنجاب دے مزید چھ ضلعیاں وچ الیکٹرک بس سروس دے افتتاح دے موقعے تے وزیراعلیٰ نے آکھیا کہ اٹک، خوشاب، بھکر، خانیوال، منڈی بہاؤالدین تے حافظ آباد وچ جدید الیکٹرک بساں چلنا شروع ہو گئیاں نیں، جتھے شہری صرف 20 روپے کرائے وچ سفر کر سکن گے۔ اوہناں نے آکھیا کہ ایس سال مزید 1500 بساں شامل ہون نال مجموعی تعداد 3 ہزار تک پہنچ جائے گی، جدکہ اگلے مرحلے وچ ایہنوں 5 ہزار تک ودھایا جائے گا۔ اوہناں دے مطابق پنجاب دیاں تمام 147 تحصیلاں تک ایہہ سہولت مرحلہ وار پہنچائی جائے گی تاکہ عوام نوں سستی، محفوظ تے ماحول دوست سفری سہولت مل سکے۔

ادھر وزیراعلیٰ مریم نواز شریف نال ازبکستان دی خودمختار ریاست قراقلی پاقستان دے کونسل آف منسٹرز دے چیئرمین فرخد ارمانوف دی قیادت وچ وفد نے ملاقات کیتی، جس وچ پاکستان وچ ازبکستان دے سفیر علیشیر توختایوف وی شریک سن۔ ملاقات وچ پنجاب تے قراقلی پاقستان دے وچکار تجارت، سرمایہ کاری، زراعت، لائیوسٹاک، ٹیکسٹائل، سیاحت تے ثقافتی تبادلیاں دے فروغ تے اتفاق کیتا گیا۔ وفد نے وزیراعلیٰ نوں قراقلی پاقستان دے خصوصی اقتصادی زونز وچ شمولیت تے دورے دی دعوت دتی، جسے اوہناں نے قبول کر لیا۔ دوہاں فریقین نے لاہور تے نوکوس نوں جڑواں شہر (سسٹر سٹیز) قرار دین، پاکستانی زمینداراں لئی آلو دی کاشت دی زمین دین تے ازبکستان دی سالانہ 30 ہزار ڈنگراں (مویشیاں) دی طلب پنجاب توں پوری کرن سمیت وکھ وکھ شعبیاں وچ تعاون ودھاون تے وی اتفاق کیتا۔ وزیراعلیٰ نے آکھیا کہ پنجاب حکومت غیر ملکی سرمایہ کاراں نوں بہترین سہولتاں دے رہی اے تے پاکستان و ازبکستان دے وچکار تجارتی راہداری تے علاقائی تعاون دے وڈے امکانات موجود نیں۔