واٹس ایپ تے مواد اپ لوڈ، فارورڈ یا شیئر کرن والا بندہ ہی ذمہ دار ہووے گا: لاہور ہائیکورٹ
گروپ دا ایڈمن یا رکن ہونا جرم نہیں، محض رکنیت دی بنیاد تے کسے نوں مجرم قرار نہیں دتا جا سکدا: جسٹس طارق عدالت نے واٹس ایپ گروپ بارے قنونی نکتہ طے کر دتا، توہین آمیز مواد پھیلادن دے ملزم دی ضمانت مسترد
لاہور (کورٹ رپورٹر) لاہور ہائیکورٹ نے توہین آمیز مواد پھیلادن دے الزام وچ گرفتار ملزم سید عبدالمنان دی بعد از گرفتاری ضمانت دی درخواست مسترد کردے ہوئے قرار دتا اے کہ محض کسے واٹس ایپ گروپ دا رکن یا ایڈمن ہونا فوجداری ذمہ داری پاون لئی کافی نہیں، بلکہ غیر قنونی یا توہین آمیز مواد اپ لوڈ، فارورڈ یا شیئر کرن والا بندہ خود اپنے عمل دا ذمہ دار ہووے گا۔ لاہور ہائیکورٹ دے جسٹس طارق سلیم شیخ نے واٹس ایپ تے مبینہ توہین آمیز مواد شیئر کرن دے الزام وچ گرفتار ملزم عبدالمنان دی درخواستِ ضمانت تے 13 صفحیاں تے مشتمل تحریری فیصلہ جاری کردے ہوئے واٹس ایپ گروپ توں متعلق اہم قنونی نکتہ طے کر دتا۔
جسٹس طارق سلیم شیخ نے فیصلے وچ لکھیا کہ صرف کسے واٹس ایپ گروپ وچ موجودگی یا خاموش رہنا جرم ثابت کرن لئی کافی نہیں، اسے طرحاں صرف گروپ دا ایڈمن ہونا وی خودکار طور تے فوجداری ذمہ داری پیدا نہیں کردا، قنونی ذمہ داری اسے بندے تے عائد ہووے گی جو غیر قنونی، توہین آمیز یا قابلِ اعتراض مواد اپ لوڈ، فارورڈ یا شیئر کرے۔ فیصلے وچ مزید آکھیا گیا کہ جدید ڈیجیٹل ذرائع ابلاغ وچ جرم دے تعین لئی ہر بندے دے انفرادی کردار دا جائزہ لینا ضروری اے تے محض گروپ دی رکنیت دی بنیاد تے کسے بندے نوں مجرم قرار نہیں دتا جا سکدا۔
عدالت نے ایف آئی اے دی طرفوں پیش کیتی گئی ٹیکنیکل اینالیسز رپورٹ نوں بادی النظر وچ قابلِ اعتماد قرار دیندے ہوئے قرار دتا کہ موجودہ مرحلے تے ریکارڈ تے موجود شواہد ملزم نوں ضمانت دین لئی کافی نہیں، عدالت نے ملزم سید عبدالمنان دی بعد از گرفتاری ضمانت دی درخواست مسترد کردے ہوئے ٹرائل کورٹ نوں ہدایت کیتی کہ مقدمے دا ٹرائل جلد توں جلد مکمل کیتا جائے تاکہ انصاف دی ویلے سر فراہمی یقینی بنائی جا سکے۔
