سیاسی تے معاشی مسلیاں دا حل مل بیٹھن وچ اے، رانا ثناء

پی ٹی آئی نے مذاکرات تے آمادگی ظاہر نہیں کیتی، اوہناں نوں سیاست کرنی چاہیدی اے، آزاد کشمیر الیکشن وچ حصہ نہ لین دی حکمتِ عملی ٹھیک نہیں اے

اسلام آباد (مانیٹرنگ ڈیسک) وزیراعظم دے مشیر سینیٹر رانا ثناء اللہ نے واضح کیتا اے کہ ملک دے سیاسی تے معاشی مسلیاں دا حل سیاستداناں دے مل بیٹھن وچ ہی چھپیا اے، ٹی وی نال گفتگو کردیاں اوہناں نے آکھیا کہ وزیراعظم شہباز شریف نے بجٹ اجلاس دے دوران خود 4 واری اپوزیشن کول جا کے اوہناں نوں مذاکرات دی باقاعدہ دعوت دتی اے، پر اپوزیشن ولوں اجے تک آمادگی دا باقاعدہ اظہار نہیں کیتا گیا۔ وزیراعظم دی پیشکش توں بعد میں محمود خان اچکزئی، بیرسٹر گوہر خان، اسد قیصر تے عامر ڈوگر سمیت پی ٹی آئی دے سینئر رہنماواں نال ٹیلیفون تے رابطہ کیتا، اوہناں نے جواب دتا کہ “اچھا ٹھیک اے، اسیں مشاورت توں بعد تہاڈے نال رابطہ کراں گے”۔

مشیرِ وزیراعظم نے آکھیا کہ اپوزیشن نال رابطیاں وچ حکومت نوں کوئی مشکل پیش نہیں آ رہی، پر جے اپوزیشن ایہہ کہے کہ اوہ بانی پی ٹی آئی دی اجازت توں بغیر حکومت نوں مل وی نہیں سکدے، تاں ایہہ اوہناں دی پارٹی دا اندرونی مسئلہ اے تے ایسی سوچ دا حکومت کول کوئی حل یا علاج نہیں اے۔ رانا ثناء اللہ نے پی ٹی آئی نوں مشورہ دتا کہ اوہ بانی پی ٹی آئی دے کیس عدالتاں وچ ضرور لڑن، پر ایہدے نال نال سیاست وی کرن، خیبر پختونخوا وچ اپنی حکومت چلاون تے پنجاب و وفاق وچ بھرپور اپوزیشن دا کردار ادا کرن۔

آزاد کشمیر الیکشناں وچ حصہ نہ لین تے تنقید کردیاں رانا ثناء اللہ نے آکھیا کہ جے پی ٹی آئی ایہہ سمجھدی اے کہ اوہناں نوں کسے الیکشن توں فائدہ نہیں ہووے گا تے اوہ اوتھوں دے حالات دا حصہ نہیں بندے، تاں ایہہ ٹھیک حکمتِ عملی نہیں اے۔