پاسکو ملازمین لئی 4 ارب 19 کروڑ دا سیورنس پیکیج منظور
سیلاب توں متاثرہ 82 سو میٹرک ٹن گندم نوں بذریعہ بولی نیلام کرن دی منظوری
اسلام آباد (اے پی پی) کابینہ دی اقتصادی رابطہ کمیٹی (ای سی سی) نے پاسکو دے ملازمین لئی 4 ارب 18 کروڑ 80 لکھ روپے دے سیورنس پیکیج دی منظوری دے دتی۔ اقتصادی رابطہ کمیٹی دا اجلاس جمعرات نوں ایتھے وفاقی وزیرِ خزانہ و محصولات سینیٹر محمد اورنگزیب دی صدارت وچ ہویا، جس وچ غذائی تحفظ، عوامی شعبے وچ اصلاحات تے پاکستان دے بین الاقوامی وعدیاں تے ذمہ داریاں توں متعلق وکھ وکھ وزارتاں تے ڈویژنز ولوں پیش کیتیاں گئیاں کئی سمریز دی منظوری دتی گئی۔
اجلاس وچ وزارتِ قومی غذائی تحفظ و تحقیق ولوں پیش کیتی گئی ایس سمری دی منظوری دتی گئی جس دے تحت پاسکو دی سیلاب توں متاثرہ 8197.989 میٹرک ٹن گندم نوں کھلی، شفاف تے مسابقتی بولی دے ذریعے نیلام کیتا جائے گا۔ ایہہ نیلامی کسے آزاد فریق (تھرڈ پارٹی) دی توثیق نال مشروط ہووے گی تاکہ مالی نقصاناں نوں گھٹ توں گھٹ کیتا جا سکے، خراب ہوئی گندم دے ذخیریاں نوں شفاف انداز وچ ٹھکانے لگایا جا سکے تے پاسکو دی تنظیمِ نو تے مرحلہ وار تحلیل (ختم کرن) دے عمل وچ مدد دتی جا سکے۔
