شہید سپریم لیڈر آیت اللہ خامنہ ای دی نمازِ جنازہ کون پڑھائے گا؟
ایران دے شہید سپریم لیڈر آیت اللہ خامنہ ای دی نمازِ جنازہ کون پڑھائے گا، ایس حوالے نال اجے تکر سرکاری طور تے کوئی واضح اعلان نہیں کیتا گیا۔
ایہ وی نہیں دسیا گیا کہ تہران، قم تے مشہد وچ نمازِ جنازہ پڑھاؤن والی شخصیت اک ہی ہوئے گی یا وکھو وکھ ہوون گیاں۔
ایرانی وزارتِ خارجہ دے ذرائع دا کہنا اے کہ مرکزی نمازِ جنازہ آیت اللہ جعفر سبحانی پڑھاؤن گے۔
تریخی لحاظ نال ویکھیے تاں ایہ ضروری نہیں کہ سپریم لیڈر دے انتقال دی صورت وچ اوہناں دی نمازِ جنازہ نویں سپریم لیڈر نے ہی پڑھائی ہووے۔
3 جون 1989 نوں جدوں ایران دے اس ویلے دے سپریم لیڈر آیت اللہ خمینی دا انتقال ہویا تاں 6 جون نوں اوہناں دی نمازِ جنازہ سید محمد رضا گُلپائیگانی نے پڑھائی سی، اوہ حوزہ علمیہ قم دے سرپرست سن۔
آیت اللہ خمینی دی نمازِ جنازہ جس ویلے سید محمد رضا گُلپائیگانی پڑھا رہے سن تاں آیت اللہ خامنہ ای پہلی صف وچ ہی اوہناں دے بالکل سجے پاسے موجود سن، پر اس ویلے تیکر آیت اللہ خامنہ ای نوں سپریم لیڈر منتخب نہیں سی کیتا گیا۔
رہبرِ اعلیٰ دے طور تے آیت اللہ خامنہ ای دا چناؤ 6 اگست 1989 نوں یعنی آیت اللہ خمینی دی نمازِ جنازہ دے ٹھیک دو مہینے بعد ہویا سی۔
امریکا تے اسرائیل دے 28 فروری نوں سانجھے حملے وچ آیت اللہ خامنہ ای دی شہادت پاروں 8 مارچ نوں یعنی تقریباً اک ہفتے وچ ہی نویں سپریم لیڈر دا چناؤ کر لیا گیا سی، پر شہید سپریم لیڈر دی چھیتی تدفین نہیں سی کیتی گئی۔
جزوی جنگ بندی دے دور وچ آیت اللہ خامنہ ای نوں سپردِ خاک کرن دیاں تاریخاں دا اعلان کیتا گیا اے تاں آیت اللہ سید مجتبیٰ حسینی خامنہ ای بطور سپریم لیڈر موجود نیں۔
کیہ ایہ ممکن اے کہ اوہ اپنے شہید پیو دی نمازِ جنازہ ادا نہ کرن؟
ایہ سوال ایس لئی اہم اے کہ نویں سپریم لیڈر دی زندگی نوں بہت زیادہ خطرہ لاحق اے، اوہناں توں اہم معاملیاں وچ رہنمائی لئی جا رہی اے پر ایس دا طریقہ ظاہر نہیں کیتا گیا۔
ایہ وی حقیقت اے کہ منصب سنبھالن توں لے کے ہن تیکر آیت اللہ سید مجتبیٰ خامنہ ای نے کسے ایک وی غیرملکی شخصیت نال آمنے سامنے ملاقات نہیں کیتی۔
نویں سپریم لیڈر دی زندگی نوں خطرے دیاں کئی ٹھوس وجہاں نیں، اوہناں وچوں سبھ توں اہم ایہ اے کہ ایران وچ امریکا اپنے اعلان کیتے ہوئے ہدف ‘رجیم چینج’ وچ کامیاب نہیں ہو سکیا۔
86 ورھیاں دے خامنہ ای دی تھاں اوہناں دے 56 سالہ پتر نے جانشینی سنبھالی تے معزول شہنشاہ پہلوی دا ٹبر ہتھ ملدا رہ گیا، ایران دے ٹوٹے ٹوٹے وی نہ ہوئے۔
ایس ورھے حج دے موقعے تے ایرانی حاجیاں نوں جاری کیتے پیغام وچ نویں سپریم لیڈر نے کہیا سی کہ اللہ اکبر دا نعرہ ایسا ہتھیار سی کہ آیت اللہ خامنہ ای دی دل سوز شہادت دے باوجود ایرانی قوم نے شاندار فتح نال دنیا نوں حیران کر دتا، تے جیویں شیطان نوں کنکریاں ماریاں جاندیاں نیں، ایس جنگ وچ ایران نے امریکا تے اسرائیل نوں اپنے میزائلیاں تے ڈرونز دا نشانہ بنا کے ہار نال دوچار کیتا۔
امریکا دے صدر ڈونلڈ ٹرمپ نے ایہ گلاں کہن والے نویں سپریم لیڈر نال ملاقات دا ارادہ تاں ظاہر کیتا سی پر اگلے ہی دہاڑے صفاٹیاں دین تے وی مجبور ہو گئے سن تے مستقبل وچ ایسی کسے وی ملاقات نوں شرطاں نال بنھ دتا سی۔
ایہ اوہی امریکا دے سپریم کمانڈر نیں جنہاں دی فوج نے ایران دی مجلسِ خبرگان دے قم تے تہران وچ دفتراں نوں اس دہاڑے نشانہ بنایا سی جدوں ایس دے ارکان آیت اللہ مجتبیٰ خامنہ ای نوں سپریم لیڈر چنن لئی اکٹھے ہونا سن۔ ایہ وکھری گل اے کہ چناؤ دا زیادہ تر عمل ورچوئل ہون پاروں ارکان محفوظ رہے سن۔
ایس پس منظر پاروں ایرانیاں کے خدشے بالکل سچے نیں کہ دشمن نویں سپریم لیڈر تے آیت اللہ خامنہ ای دے جنازے دے جلوس نوں وی نشانہ بنا سکدا اے۔
نمازِ جنازہ دے اکٹھ 4 توں 6 جولائی تیکر تہران وچ تے 7 جولائی نوں قم وچ ہوون گے، جدکہ 8 جولائی نوں جسدِ خاکی عراق لے جایا جائے گا جتھے نجف تے کربلا وچ نمازِ جنازہ دے اکٹھاں توں بعد اسی رات میت واپس لیائے جان دا پروگرام بنایا گیا اے۔
9 جولائی نوں آخری نمازِ جنازہ مشہد وچ ادا کیتی جائے گی تے فیر اوتھے ہی اوہناں دی تدفین کیتی جائے گی۔
ذرائع دا کہنا اے کہ شہید آیت اللہ خامنہ ای دی نمازِ جنازہ وچ اک کروڑ توں ودھ لوکاں دی متوقع شرکت دے موقعے تے نویں سپریم لیڈر دی سکیورٹی یقینی بنانا بہت وڈا چیلنج ہوئے گا کیونکہ عوام نہ صرف شہید لیڈر دا آخری دیدار کرنا چاہندے نیں بلکہ نویں سپریم لیڈر دی اک جھلک ویکھن لئی وی بے تاب نیں۔
امکان ایہو ای اے کہ نویں سپریم لیڈر دی سکیورٹی نوں اوہناں دے عوامی دیدار تے مقدم رکھیا جائے گا۔
