سکیورٹی فورسز نے بلوچستان وچ 4 دناں وچ 54 دہشت گرداں نوں جہنم واصل کیتا، وطنِ عزیز دا دفاع کردیاں ہویاں 42 شہادتاں ہوئیاں: ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری دا کہنا اے کہ پچھلے 4 دناں وچ بلوچستان وچ دہشت گردی دے 3 وڈے واقعے ہوئے، سکیورٹی فورسز تے قانون نافذ کرن والے اداریاں دیاں کارروائیاں وچ 54 دہشت گرد ہلاک ہوئے، 3 واقعیاں وچ وطنِ عزیز دا دفاع کردیاں ہویاں 42 شہادتاں ہوئیاں۔

ڈی جی آئی ایس پی آر نے بلوچستان وچ سکیورٹی دی صورتحال تے بریفنگ دیندیاں ہویاں کہیا کہ فتنہ الخوارج دے دہشت گرداں نے مذموم مقاصد لئی معصوم شہریاں نوں نشانہ بنایا، بلوچستان دے بہادر عوام تے پولیس نے دلیری نال مقابلہ کیتا۔

پہلا واقعہ 4 تے 5 جولائی دی درمیانی رات ہنہ اوڑک وچ پیش آیا: ڈی جی آئی ایس پی آر

ڈی جی آئی ایس پی آر نے دسیا کہ ہنہ اوڑک وچ فتنہ الخوارج دے دہشت گرداں نے عوام تے حملہ کیتا، ہنہ اوڑک دے عوام انہاں دہشت گرداں دے نال بہادری نال لڑے، بہادر عوام نے دہشت گرداں توں علاقہ خالی کرایا، ایس دوران 4 شہری شہید تے 6 زخمی ہوئے۔

دوجا واقعہ 6 جولائی نوں مانگی ڈیم دے پمپنگ اسٹیشن دے نیڑے پولیس چیک پوسٹ تے پیش آیا: ڈی جی آئی ایس پی آر

ڈی جی آئی ایس پی آر نے دسیا کہ دوجا واقعہ 6 جولائی نوں مانگی ڈیم دے پمپنگ اسٹیشن دے نیڑے پولیس دی چیک پوسٹ تے پیش آیا، فتنہ الخوارج دے دہشت گرد نے پمپنگ اسٹیشن دی چیک پوسٹ تے حملہ کیتا، پولیس دے جواناں نے بہادری نال دہشت گرداں دا مقابلہ کیتا، 15 خارجی جہنم واصل کیتے، 6 جولائی نوں دہشت گرداں نال لڑائی وچ پولیس دے 9 جوان شہید ہوئے، سکیورٹی فورسز دے پہنچن توں پہلے دہشت گرداں نے پولیس جواناں نوں یرغمال بنا لیا سی، دہشت گرد 15 خارجیاں دیاں لاشاں اوتھے چھڈ کے گئے۔

ڈی جی آئی ایس پی آر دے مطابق پولیس دے انہاں یرغمال جواناں دا تعلق بلوچستان توں سی، سکیورٹی فورسز نے انہاں دہشت گرداں دے دوالے احتیاط نال گھیرا تنگ کیتا کیونکہ اوہناں کول ساڈے بچے یرغمال سن، 6 جولائی توں زیارت دے پہاڑاں وچ انہاں دہشت گرداں نال اینگیجمنٹ چل رہی سی، انہاں دہشت گرداں نوں لگا کہ گھیرا تنگ ہو چکیا اے تے انہاں بزدلاں نے 18 پولیس جواناں نوں شہید کر دتا، ایس انگیجمنٹ وچ 11 خارجیاں دے مارے جان دی تصدیق ہوئی اے پر تعداد ایہدے توں زیادہ اے۔

ڈی جی آئی ایس پی آر دے مطابق مانگی چیک پوسٹ واقعے وچ ہن تیکر 27 پولیس جوان شہید ہوئے، چیک پوسٹ تے حملے وچ ہن تیکر 26 خارجی جہنم واصل کیتے گئے۔

دہشت گردی دا تیجا واقعہ اج بیلہ وچ پیش آیا: ڈی جی آئی ایس پی آر

ڈی جی آئی ایس پی آر دے مطابق تیجا واقعہ اج بیلہ وچ فوجی قافلے دی بی ایل اے دے دہشت گرداں نال انگیجمنٹ دا پیش آیا، بی ایل اے دے دہشت گرداں نال لڑائی وچ 14 دہشت گرد مارے گئے، ایس کارروائی وچ فوج دے اک جے سی او تے 10 جوان شہید ہوئے، خاران تے دالبندین وچ اج آپریشن کیتے گئے، خاران وچ 6 تے دالبندین وچ 8 فتنہ الخوارج دے دہشت گرد مارے گئے۔

ڈی جی آئی ایس پی آر نے دسیا کہ قانون نافذ کرن والے اداریاں دیاں کارروائیاں وچ 54 دہشت گرد ہلاک ہو چکے نیں، دہشت گرداں تے اوہناں دے سہولت کاراں دے خاتمے لئی کارروائیاں جاری نیں۔

پاکستان وچ دہشت گردانہ کارروائیاں وچ بھارت ملوث اے: ڈی جی آئی ایس پی آر

ڈی جی آئی ایس پی آر دے مطابق پاکستان دی خوشحالی تے ترقی دے دشمن دہشت گردی دے انہاں واقعیاں وچ ملوث نیں۔

ڈی جی آئی ایس پی آر دے مطابق دہشت گردانہ کارروائیاں بھارت تے اوہ قوتاں کروا رہیاں نیں جیہناں نوں پاکستان دی عزت تے استحکام برداشت نہیں ہوندا، افغانستان دی سرزمین غیر قانونی افغان طالبان رجیم دے زیرِ قبضہ ایس دہشت گردی لئی استعمال ہو رہی اے، دہشت گردی دے انہاں واقعیاں وچ زیادہ تر مارے گئے دہشت گرد افغان سن، کراچی واقعے وچ ملوث 4 حملہ آوراں وچ 3 افغان دہشت گرد سن، انہاں دہشت گرداں نوں سہولت کاری افغان طالبان رجیم فراہم کر رہی اے۔

ڈی جی آئی ایس پی آر نے پریس کانفرنس کردیاں ہویاں کہیا کہ افغان طالبان رجیم نوں پاکستان دی عزت تے وقار توں مسئلہ اے، اوہناں نوں ہر اوس چیز توں مسئلہ اے جیہڑی بلوچستان دے عوام لئی اے، اوہناں نوں کوئٹہ لئی جان والی پانی دی پائپ لائن توں مسئلہ اے۔

دنیا وچ کوئی مائی دا لعل پیدا نہیں ہویا جیہڑا پاکستان نوں دھمکا سکے: ڈی جی آئی ایس پی آر

ڈی جی آئی ایس پی آر نے کہیا اسیں روز انہاں دہشت گرداں دا تعاقب کراں گے تے اوہناں نوں نشانہ بناواں گے، بلوچستان دے وزیراعلیٰ بائی روڈ زیارت گئے، تن سال توں ریاست جیہڑی واضح پالیسی دکھا رہی اے اوہناں نوں ایہدے توں پریشانی اے، ریاست واضح دس رہی اے کہ ایہ فتنہ الہندوستان اے اوہناں دا بلوچستان یا بلوچیت نال کوئی تعلق نہیں، ریاست واضح دس رہی اے کہ ایہ فتنہ الخوارج اے ایہدا اسلام نال کوئی تعلق نہیں، غیر قانونی افغان مقیم باشندیاں نوں پاکستان توں چُک کے باہر سٹاں گے، دنیا وچ کوئی مائی دا لعل پیدا نہیں ہویا جیہڑا پاکستان نوں دھمکا سکے۔

ڈی جی آئی ایس پی آر نے واضح کر دتا کہ پاکستان تے بلوچستان ایتھے اے تے ہمیشہ رہے گا، ہر دہشت گرد تے اوہناں دے تمام سہولت کاراں دا پچھا کراں گے، تسیں ساڈے بچیاں تے شہریاں تے ہتھ پاؤندے ہو تے سمجھدے ہو اسیں آ کے گل بات کراں گے، عوام، فوج تے قانون نافذ کرن والے ادارے ہر لمحے دہشت گردی دے خلاف جنگ لڑ رہے نیں، ہر صورت سانوں کامیابی حاصل ہوئے گی کیونکہ اسیں حق تے سچ تے کھڑے آں۔