فیفا ورلڈ کپ: مراکش تے فرانس دے میچ دے سارے آفیشلز ارجنٹینا توں چنے جان تے سوال کھڑے ہو گئے۔
فیفا نے ورلڈ کپ 2026 دے 2 کوارٹر فائنلز دے میچ آفیشلز دا اعلان کر دتا اے جیہدے وچوں پہلے کوارٹر فائنل دے آفیشلز دے چناؤ نے سوال کھڑے کر دتے نیں-
فیفا ولوں ایکس اکاؤنٹ تے 9 جولائی دی رات نوں ہون والے ورلڈ کپ 2026 دے پہلے کوارٹر فائنل دے میچ آفیشلز دا اعلان کیتا گیا اے۔
ایہ میچ مراکش تے فرانس دے وچکار امریکا دے شہر بوسٹن وچ کھیڈیا جائے گا۔
فیفا ولوں ایس میچ لئی جنہاں 5 آفیشلز دا اعلان کیتا گیا اے، حیرت انگیز طور تے سب دا تعلق ارجنٹینا توں اے۔ میچ ریفری سمیت دوویں اسسٹنٹ ریفریز، ریزرو اسسٹنٹ ریفری تے فورتھ آفیشل دا تعلق ارجنٹینا توں اے۔
ایس چناؤ تے سوشل میڈیا صارفین سمیت دنیا بھر توں فٹ بال شائقین نے حیرت تے شکوک و شبہات دا اظہار کیتا اے۔
اک صارف نے لکھیا کہ فرانس دے میچ لئی سارے ریفری ارجنٹینا توں نیں؟ ایسا لگدا اے کہ فیفا اک واری پھر ہر ممکن کوشش کر رہیا اے تاں جے ورلڈ کپ ارجنٹینا دے ہتھ وچ تھما دتا جائے۔
اک صارف نے کہیا کہ کی تسیں ایہ میچ وی فرانس دے حق وچ پہلے ای طے کر رکھیا اے؟ فیفا وچ موجود بدعنوانی دا ضرور احتساب ہونا چاہیدا اے۔ تسیں مصر دے خلاف جو کچھ ہون دتا، اوہ انتہائی شرمناک سی۔
اک ہور صارف نے لکھیا کہ تہاڈے کول 50 ملکاں دے ریفری موجود نیں، پر تسیں صرف ارجنٹینا دے ریفری ای چنے۔ ہن تے سدھا ورلڈ کپ ای ارجنٹینا دے حوالے کر دیو۔
ایس معاملے تے سابق ویسٹ انڈین کپتان تے آل راؤنڈر کارلوس بریتھ ویٹ وی خاموش نہ رہ سکے۔
ایکس تے پوسٹ کردیاں ہویاں اوہناں دا کہنا سی کہ گھٹ توں گھٹ تھوڑا پردے وچ تے رہو، کھلم کھلا ساڈے سامنے جانبداری تے اپنے ایجنڈے دا مظاہرہ کر رہے ہو۔
اک ہور پوسٹ وچ کارلوس بریتھ ویٹ نے ارجنٹینا تے مصر دے میچ تے تبصرہ کردیاں ہویاں کہیا کہ میں آؤن والی نسل نوں ایس دور وچ اپنی اکھاں دے سامنے ہون والی ایس لٹ مار دے بارے وچ کیویں سمجھاواں گا؟
اک صارف نے سوال چکیا کہ آخر فیفا ایسے ریفری کیویں مقرر کر سکدا اے جیہڑے اک ایسے ملک توں تعلق رکھدے نیں جیہڑا اجے وی ٹورنامنٹ وچ موجود اے؟ لگدا اے ہر چیز بار بار ارجنٹینا دے ای حق وچ جا رہی اے۔
