100 میگا واٹ سولر منصوبہ وفاقی حکومت دا جی بی دے عوام لئی تحفہ: شہباز شریف
پاور ڈویژن منصوبے دی تنصیب لئی اپنی ذمہ واری پوری کرے، خریداری دے عمل وچ شفافیت یقینی بناؤن دی ہدایت 499 سرکاری عمارتاں دیاں چھتاں تے بیٹری سٹوریج سمیت 18 میگاواٹ سولر سسٹم دسمبر تک لا دتا جائے گا: بریفنگ
اسلام آباد (نامہ نگار) وزیرِاعظم شہباز شریف نے کہیا اے کہ ماحول دوست صاف، سستی تے پائیدار توانائی دے فروغ لئی شمسی توانائی دا وادھا قومی توانائی دا اک اہم حصہ اے۔ 100 میگاواٹ سولر منصوبہ وفاقی حکومت ولوں گلگت بلتستان دے عوام لئی اک تحفہ اے۔ وزیرِاعظم آفس توں جاری بیان دے مطابق اِناں خیالاں دا اظہار اوہناں نے گلگت بلتستان لئی 100 میگاواٹ شمسی توانائی منصوبے دے جائزہ اجلاس دی صدارت کردیاں ہوئیاں کیتا۔ وزیرِاعظم نے کہیا کہ پاور ڈویژن منصوبے نوں لاؤن تے ویلے سر پورا کرن دے حوالے نال اپنی ذمہ واری پوری کرے۔ وزیرِاعظم نے ہدایت دتی کہ سولر منصوبے لئی خریداری دے عمل وچ پوری شفافیت یقینی بنائی جائے۔
ساریاں ادائیگیاں تریجی دھر (تھرڈ پارٹی) دی توثیق توں بعد کیتیاں جان۔ اجلاس وچ گلگت بلتستان شمسی توانائی منصوبے تے ہون والی پیشرفت بارے بریفنگ دتی گئی۔ بریفنگ وچ دَسیا گیا کہ ایس منصوبے دے تحت 499 سرکاری عمارتاں دیاں چھتاں تے بیٹری سٹوریج سمیت 18 میگاواٹ سولر سسٹم دسمبر 2026 تک لا دتا جائے گا۔ 82 میگاواٹ یوٹیلیٹی سکیل سولر منصوبے دا پی سی ون (PC-1) منظوری لئی ایکنک (ECNEC) نوں گھل دتا گیا اے۔ بریفنگ وچ ہور دَسیا گیا کہ 82 میگاواٹ سولر منصوبے توں تقریباً 13 لاکھ لوکاں نوں فائدہ پہنچے گا۔ منصوبے دے پورا ہون نال گلگت بلتستان وچ سروس دا معیار بہتر ہوئے گا تے لوڈ شیڈنگ مکاؤن وچ مدد ملے گی۔
اجلاس وچ وفاقی وزیر پاور ڈویژن سردار اویس لغاری، وزیرِ مملکت برائے خزانہ تے ریلوے بلال اظہر کیانی تے دوجے متعلقہ اعلیٰ سرکاری افسراں نے شرکت کیتی۔
