’’اپنا گھر، محفوظ گھر‘‘ پروگرام شروع کرن دا فیصلہ، کوتاہی برداشت نہیں: مریم نواز
مخدوش گھراں دی رینوویشن لئی 5 لاکھ، نویں بلڈنگ سٹوری یا اضافی فلور بناؤن لئی سود توں پاک 10 لاکھ دتے جان گے بحران وچ بیانات نہیں، عملی اقدامات ہی گڈ گورننس نیں: اجلاس وچ گفتگو، وزیراعلیٰ نال سپیکر ملک محمد احمد دی ملاقات
لاہور (نیوز ایجنسیاں) وزیرِاعلیٰ پنجاب مریم نواز شریف نے کاہنہ ورگے سانحیاں نوں روکن لئی پنجاب دے گھراں نوں محفوظ بناؤن دی خاطر “اپنی چھت، اپنا گھر” پروگرام توں ہٹ کے اِک نواں ’’اپنا گھر، محفوظ گھر‘‘ پروگرام شروع کرن دا فیصلہ کیتا اے۔ وزیرِاعلیٰ دی صدارت ہیٹھ ہوئے خصوصی اجلاس وچ “اپنی چھت، اپنا گھر” پروگرام دا دائرہ کار ہور ودھاؤن تے اتفاق کیتا گیا۔ ایس موقعے تے “اپنا گھر، محفوظ گھر” پروگرام دے تحت 2 نویاں کیٹیگریاں متعارف کراؤن تے غور کیتا گیا۔
ایس پروگرام دے تحت کمزور چھتاں والے خستہ حال تے مخدوش گھراں نوں محفوظ بناؤن تے اوہناں دی رینوویشن (مرمت) لئی 5 لاکھ روپے دتے جان گے۔ جدکہ نویں بلڈنگ سٹوری یا اضافی فلور بناؤن لئی سود توں پاک اسان قسطاں تے 10 لاکھ روپے دتے جان گے۔ ایس موقعے تے باکو وچ پنجاب پاکستان پویلین دی شاندار کامیابی دی رپورٹ تے اِک خصوصی دستاویزی فلم (ڈاکومنٹری) وی پیش کیتی گئی۔
اجلاس وچ “اپنی چھت، اپنا گھر” پروگرام دے تحت 1 لاکھ 80 ہزار توں ودھ بے گھر خانداناں لئی سود توں پاک آسان قسطاں والے قرضے منظور کیتے گئے۔ اجلاس نوں بریفنگ وچ دَسیا گیا کہ ایس پروگرام دے تحت ہن تک 1 لاکھ 70 ہزار خانداناں نوں قرضے دتے جا چکے نیں۔ “اپنی چھت، اپنا گھر” منصوبے لئی 2178 ارب روپے جاری کیتے گئے نیں، جدکہ پروگرام دے تحت پورے پنجاب وچ ساڑھے 27 ہزار گھر پورے ہون دے آخری مراحل وچ نیں۔ اِسے پروگرام دے تحت پنجاب بھر وچ 1 لاکھ 34 ہزار 343 گھر مکمل ہو چکے نیں۔
وزیرِاعلیٰ مریم نواز شریف نے پروگرام دی دوجی قسط تن دناں دے اندر اندر عوام نوں جاری کرن دا حکم دتا تے کہیا کہ “بحران وچ بیانات نہیں، عملی اقدامات ہی گڈ گورننس ہوندی اے۔” اوہناں ہور کہیا کہ “اپنی چھت، اپنا گھر تے ایس نال جڑے سارے پروگرام پنجاب حکومت دے فلیگ شپ پراجیکٹ نیں، ایس وچ کوئی کوتاہی برداشت نہیں کیتی جائے گی۔ غریب تے کوئی بوجھ نہیں پایا جائے گا تے نہ ہی قرضے لین دے اصولاں وچ کوئی تبدیلی ہوئے گی۔” بریفنگ وچ دَسیا گیا کہ “اپنی زمین، اپنا گھر” پروگرام دے تحت 23 ضلعیاں وچ 2 ہزار پلاٹ دتے گئے نیں۔ اجلاس وچ اِناں علاقیاں دی بحالی تے ترقیاتی کماں دی رپورٹ وی پیش کیتی گئی۔ وزیرِاعلیٰ مریم نواز نے گھر بناؤن لئی قرضہ لین دے طریقے نوں پہلاں توں بھی زیادہ آسان بناؤن دی ہدایت دتی تے کہیا کہ جنہاں 2 ہزار بے گھر خانداناں نوں حکومت نے مفت پلاٹ دتے نیں، ہن اوہناں نوں گھر بناؤن لئی قرضہ وی دتا جائے گا۔ جنہاں دے گھر مخدوش یا چھتاں کمزور نیں، پنجاب حکومت اوہناں نوں محفوظ تے بہتر بناؤن وچ مدد کرے گی۔
ایس دوران وزیرِاعلیٰ نال سپیکر پنجاب اسمبلی ملک محمد احمد خان نے ملاقات کیتی۔ ایس موقعے تے صوبائی اسمبلی دی کارروائی نوں آپسی ہم آہنگی نال اَگے ودھاؤن تے اتفاق کیتا گیا۔ جیل اصلاحات لئی قانون سازی دے معاملیاں تے وی گل بات کیتی گئی تے وزیرِاعلیٰ مریم نواز نے بطور سپیکر پنجاب اسمبلی حکومتی تے اپوزیشن ممبراں نوں قانون سازی وچ شامل کرن دی ہدایت کیتی۔ سپیکر ملک محمد احمد خان نے نیشنل پیغامِ امن کمیٹی وچ وزیرِاعلیٰ ولوں شاندار پالیسی پیش کرن تے “اپنا کھیت، اپنا روزگار” سکیم شروع کرن تے اوہناں نوں خراجِ تحسین پیش کیتا۔ دوجے پاسے وزیرِاعلیٰ مریم نواز شریف نے “اپنا کھیت، اپنا روزگار” سکیم نوں پوری ٹیم دی کامیابی قرار دتا تے کہیا کہ پنجاب وچ عوام لئی ہر روز نویں توں نویں پراجیکٹ لا رہے آں۔ حکومت دی نظر ہن پسماندہ علاقیاں تے اے، جہاں سڑکاں تے الیکٹرک بساں چلائیاں جان گیاں تے زراعت وچ جدید مشینری لائی جائے گی۔
دوجے پاسے وزیرِاعلیٰ مریم نواز نے مقبوضہ جموں و کشمیر دی تحریکِ آزادی دے رہنما برہان وانی شہید دی برسی دے موقعے تے اپنے خصوصی پیغام وچ کہیا کہ برہان وانی شہید مقبوضہ جموں و کشمیر دے اصل ہیرو نیں۔ برہان وانی دی شہادت نے ثابت کیتا اے کہ کشمیر دا بچہ بچہ آزادی دے جذبے نال بھریا ہویا اے۔ پاکستان ہمیشہ کشمیری عوام دی آزادی دی جدوجہد دا مقدمہ پوری دنیا وچ اٹھاندا رہے گا۔ اقوامِ متحدہ سمیت پوری عالمی برادری دی قانونی تے اخلاقی ذمہ واری اے کہ وہ کشمیریاں نال کیتا ہویا وعدہ پورا کرے۔
