حکومتی منظوری توں بغیر مفادِ عامہ دی زمین دا نجی یا تجارتی استعمال نہیں ہو سکدا: وفاقی آئینی عدالت
عدالتی نیلامی توں زمین دا خریدار اصل کمپنی دیاں قانونی شرطاں دا پابند رہندا اے، استعمال دی نوعیت تبدیل نہیں ہوندی: تحریری فیصلہ شریعت دے اصول ایس گل دی تائید کردے نیں: عدالت، ملز دی جگہ ہاؤسنگ سوسائٹی بناؤن دی اجازت دی اپیل مسترد، ہائی کورٹ دا فیصلہ برقرار
اسلام آباد (کورٹ رپورٹر) وفاقی آئینی عدالت نے قرار دتا اے کہ لینڈ ایکوزیشن ایکٹ 1894 دے تحت لوکائی دے مقصد (عوامی مقصد) لئی حاصل کیتی گئی زمین نوں حکومت دی پیشگی منظوری توں بغیر نجی یا تجارتی استعمال یا ہاؤسنگ سکیم وچ تبدیل نہیں کیتا جا سکدا۔ عدالتی نیلامی راہیں ملکیت منتقل ہون نال زمین دی قانونی حیثیت تبدیل نہیں ہوندی، نواں خریدار صرف اوہی حق حاصل کردا اے جہڑے اصل کمپنی کول سن تے اوہ زمین دے حصول ویلے لائیاں گئیاں قانونی تے معاہداتی شرطاں دا پابند ہوندا اے۔ شریعت دے اصول وی ایس امر دی تائید کردے نیں کہ عوامی مقصد لئی حاصل کیتی گئی زمین نوں نجی تجارتی مفاد لئی استعمال نہیں کیتا جا سکدا۔
وفاقی آئینی عدالت دے چیف جسٹس امین الدین خان تے جسٹس علی باقر نجفی تے مشتمل دو رکنی بینچ نے تحریری فیصلے وچ ایم/ایس عادل انٹرنیشنل دی درخواستِ اجازتِ اپیل مسترد کردیاں ہوئیاں پشاور ہائی کورٹ دا فیصلہ برقرار رکھیا۔ عدالت نے قرار دتا کہ لینڈ ایکوزیشن ایکٹ دی دفعہ 41 دے تحت حکومت تے اصل کمپنی دے وچکار معاہدہ قانونی حیثیت رکھدا اے، جس دے مطابق زمین صرف بورڈ تے پیپر ملز دے لاؤن تے آپریشن لئی استعمال کیتی جا سکدی سی۔ دفعہ 43-اے دے تحت ایسی زمین دی ویچ وٹاندرا (فروخت)، لیز، رہن، منتقلی یا استعمال وچ تبدیلی صوبائی حکومت دی پیشگی منظوری توں بغیر نہیں کیتی جا سکدی۔
عوامی مقصد لئی حاصل کیتی گئی زمین نجی مفاداں یا تجارتی فائدے لئی استعمال کرن دی اجازت دینا لینڈ ایکوزیشن دے قانونی ڈھانچے تے آئین دے آرٹیکل 24 دے الٹ (منافی) ہوئے گا۔ آئین شہریاں نوں جائیداد رکھن دا بنیادی حق دیندا اے، پر ریاست صرف عوامی مفاد تے قانون دے مطابق ہی کسی بندے دی جائیداد حاصل کر سکدی اے۔ ایس لئی جدوں اوہ عوامی مقصد ختم ہو جائے یا زمین اودے برعکس استعمال ہون لگ پئے تاں حکومت قانون دے مطابق کارروائی کرن دا حق رکھدی اے۔ فیصلے وچ اسلامی تعلیمات دا حوالہ دیندیاں ہوئیاں کہیا گیا کہ اسلام وچ نجی ملکیت نوں تحفظ حاصل اے تے کسی دی جائیداد نوں ناجائز طور تے استعمال کرنا یا ہڑپ کرنا منع اے۔ جے صوبائی حکومت سمجھے کہ زمین اصل مقصد لئی ہن ہور درکار نہیں، تاں وہ قانون دے مطابق کارروائی کرن دی مجاز ہوئے گی۔
