کارگو جہاز دا ملبہ مل گیا، عملے دی بھال، تحقیقات تیز، کے ٹو ایئر ویز دا آفس سیل
ملبہ سمندر توں اوڑمارہ دے جنوب وچ ملیا، پاک بحریہ تے میری ٹائم سکیورٹی دا آپریشن جاری، تحقیقاتی ٹیم وی کراچی پہنچ گئیجہاز نوں پائلٹ رضوان تے فیصل جتوئی اڈا رہے سن، ایئرلائن ریکارڈ تے حفاظتی اصولاں دا جائزہ، صدر تے وزیراعظم دا دکھ دا اظہار
کراچی، اسلام آباد (مانیٹرنگ ڈیسک، نیوز ایجنسیاں، نامہ نگار، سٹاف رپورٹر) نجی کارگو ایئرلائن ‘کے ٹو ایئرویز’ دے شارجہ توں کراچی آؤن والے کارگو جہاز دے بحیرہِ عرب وچ لاپتہ ہون توں بعد سرچ اینڈ ریسکیو آپریشن جاری اے۔ پاک بحریہ تے پاکستان میری ٹائم سکیورٹی ایجنسی (PMSA) دے مطابق 12 گھنٹیاں توں ودھ جاری رہن والے سانجھے آپریشن دے دوران جہاز دا ملبہ بلوچستان دے ساحلی علاقے اوڑمارہ توں 53 ناٹیکل میل جنوب وچ سمندر توں لبھ لیا گیا اے۔ ملبے دی نشاندہی توں بعد ہور ثبوتاں تے عملے دے بندیاں دی بھال (تلاش) جاری اے۔ بیورو آف ایئرکرافٹ سیفٹی انویسٹی گیشن دی 11 رکنی تحقیقاتی ٹیم اسلام آباد توں کراچی پہنچ گئی اے۔
ایہ ٹیم جائے وقوعہ دا دورہ کرن دے نال نال ‘کے ٹو ایئرویز’ دے دفتراں وچ تکنیکی ریکارڈ، جہاز دی مینٹی نینس لاگ بکس، پرواز دیاں دستاویزاں تے عملے دی تفصیلات دا جائزہ لوے گی۔ تحقیقات دے دوران ایہ وی ویکھیا جائے گا کہ قومی تے بین الاقوامی حفاظتی اصولاں (ضوابط) تے پورا عمل کیتا گیا سی یا نہیں۔ پاکستان ایئرپورٹس اتھارٹی نے ‘کے ٹو ایئرویز’ دا مرکزی دفتر سیل کر دتا اے، جدکہ آپریشنل لوزاں (ضروریات) نوں ساہمنے رکھدے ہوئیاں کمپنی دے اک دفتر نوں کھلا رکھن دی اجازت دتی گئی اے۔ ذرائع دے مطابق بوئنگ 737 نوں حادثہ نیوی گیشن سسٹم وچ خرابی پاروں پیش آیا۔ جہاز نوں پائلٹ رضوان ادریس تے فیصل جتوئی اڈا رہے سن جدکہ ایس وچ عملے دے پنج بندے سوار سن۔
وزیراعظم شہباز شریف نے حادثے تے ڈونگھے رنج و غم تے افسوس دا اظہار کردیاں ہوئیاں عملے دے گھروالیاں نال دلی ہمدردی کیتی اے۔ اوہناں نے پاکستان سول ایوی ایشن، پاک بحریہ تے پاکستان ایئر فورس نوں سرچ اینڈ ریسکیو کارروائیاں تیز کرن تے سارے ممکنہ وسائل ورتن دی ہدایت دتی اے۔ صدرِ مملکت آصف علی زرداری نے بھی نجی کارگو جہاز دے بحیرہِ عرب وچ لاپتہ ہون تے ڈونگھی تشویش تے افسوس دا اظہار کردیاں ہوئیاں پِیڑت گھروالیاں نال دلی ہمدردی دا اظہار کیتا اے۔
