“فیس بک اُتے پوسٹ بہت سوچ سمجھ کے کرو، نئیں تے !!”

“فیس بک اُتے کجھ بھی پوسٹ کرن توں پہلاں اک واری لازمی سوچو کہ کتے ایہہ پوسٹ سائبر کرائم مافیا دی کسی منفی سرگرمی دا ذریعہ نہ بن جائے۔ جے تسیں فیس بک اُتے اپنے کسی بیلی (دوست) نال ہون والے جھگڑے دا ذکر کرو تے بعد وچ اوہ اے آئی سرچ دے نتیجے وچ سامنے آ جائے، تاں کیہ ایہہ عجیب نہیں لگے گا؟ جی ہاں!! فیس بک دا نواں اے آئی موڈ پبلک پوسٹس نوں سرچ رزلٹس لئی بطور ڈیٹا سورس استعمال کر رہیا اے، جس نال سائبر کرائم تے غلط معلومات دے کھنڈن (پھیلاؤ) دا خطرہ ودھ سکدا اے۔ رپورٹ دے مطابق فیس بک اپنے سرچ فیچر وچ مصنوعی ذہانت (اے آئی) اُتے مبنی وڈی تبدیلی متعارف کروان دی تیاری کر رہیا اے، جس توں بعد سرچ بار صرف لفظ لبھن دے بجائے اک چیٹ اسسٹنٹ وانگوں کم کرے گا۔ نویں فیچر راہیں صارفین کئی سال پرانیاں عوامی پوسٹس، کمنٹس تے ہور دستیاب معلومات نوں سوال جواب دی شکل وچ سوکھے طریقے نال لبھ سکن گے۔ ایس نال اوہ معلومات وی چند لمحات وچ سامنے آ سکن گیاں جیہڑیاں پہلاں ہزاراں پوسٹس دے وچکار لبھنا اوکھا سی۔ ماہرین دے مطابق ایہہ فیچر معلومات تیکر پہنچ نوں سوکھا بنائے گا، پر ایس دے نال رازداری تے آن لائن سکیورٹی بارے خدشات وی ودھ سکدے نیں. اوہناں دا کہنا اے کہ جے عوامی پوسٹس نوں اے آئی راہیں زیادہ بہتر طریقے نال لبھیا تے اوہدا تجزیہ کیتا جان لگا تاں سائبر فراڈ وچ ملوث بندے وی صارفین دی معلومات توں فائدہ چُک کے اوہناں نوں زیادہ سوکھیاں نشانہ بنا سکدے نیں. اپنے ذاتی ڈیٹا نوں اے آئی توں بچاؤن لئی فیس بک اُتے لکھی پوسٹ نوں پبلک بالکل نہ کرو بلکہ صرف اپنے دوستاں تے فالوورز تیکر محدود رکھو، جس دا طریقہ ایہہ اے کہ فیس بک دی سیٹنگ وچ جاؤ تے ’لمٹ پاسٹ پوسٹس‘ دا ٹول استعمال کرو۔ ایس عمل نال تہاڈیاں ساریاں پرانیاں پبلک پوسٹس اونلی فرینڈز ہو جان گیاں۔ ماہرین نے صارفین نوں متّ (مشورہ) دتی اے کہ اوہ سوشل میڈیا اُتے ذاتی معلومات شیئر کردیاں احتیاط برتن تے اپنی پرائیویسی سیٹنگز دا باقاعدگی نال جائزہ لیندے رہن تاں جے فالتو معلومات عوامی طور اُتے دستیاب نہ ہون۔”