“پختونخوا وچ مراعات بل عدالت وچ چیلنج کرنا چاہیدا اے: عظمیٰ”
اینیاں مراعتاں تے مغلِ اعظم نوں وی حاصل نہیں سن جنیاں ایم پی ایز نوں دتیاں گئیاں؛ صحافیاں دے اسمبلی داخلے نوں حکومتی پسند ناپسند نال جوڑنا آزادیِ صحافت تے حملہ اے
لاہور: پنجاب دی وزیر اطلاعات تے ثقافت عظمیٰ بخاری نے خیبر پختونخوا اسمبلی ولوں اسمبلیاں دے ممبراں دیاں مراعتاں بارے منظور کیتے گئے بل تے تگڑی تنقید کردیاں آکھیا اے کہ ایہہ بل رات دے ہنھیرے وچ منظور کیتا گیا تے لوکاں توں ایس دی سچائی لکان دی کوشس کیتی گئی۔ لنگھے ہوئے کل تیکر تحریک انصاف دے ترجمان ایس بل دے ہون توں ای مکردے رہے، پر ہن سچائی سب دے ساہمنے آ چکی اے۔ مراعات بل نوں عدالت وچ چیلنج کرنا چاہیدا اے۔ خیبر پختونخوا حکومت دے ترجمان ایہہ تاثر دیندے رہے کہ بلیو پاسپورٹ دی سہولت سارے صوبیاں دے اسمبلی ممبراں نوں حاصل اے، حالانکہ ایہہ نرا جھوٹ اے۔
پنجاب وچ اسمبلی ممبراں نوں صرف اپنی ممبرشپ دے ویلے دوران محدود قسم دا سرکاری پاسپورٹ دتا جاندا اے، جیہڑا صرف اس ممبر لئی ہوندا اے، اوہدی فیملی ایس سہولت دی حقدار نہیں ہوندی۔ ٹول ٹیکس توں چھٹی (استثنا)، سرکاری ریسٹ ہاؤسز وچ ٹبر سمیت عیاشیاں، بلیو پاسپورٹ تے دوجیاں فالتو مراعتاں لوکاں دے ٹیکس دے پیسیاں تے عیاشی کرن دے برابر نیں۔ لنگھے ویلے وچ بلیو پاسپورٹ دے غلط ورتوں دیاں مثالاں وی سب دے ساہمنے نیں۔ وزیر اطلاعات نے صحافیاں بارے شق تے وڈے تحفظات دا اظہار کردیاں آکھیا کہ جے اسمبلی وچ صرف پسند دے صحافیاں نوں داخلے دی اجازت دتی جائے تے ناپسندیدہ صحافیاں تے پابندی لائی جائے تے ایہہ آزادیِ صحافت تے اک وڈا حملہ ہووے گا۔
خیبر پختونخوا وچ اسمبلی ممبراں لئی اٹھ اٹھ کلاشنکوفاں دے لائسنس منگے جا رہے نیں۔ کیہ ایہہ ڈی چوک تے چڑھائی کرن لئی یا کور کمانڈر ہاؤس ورگیاں حساس جگہواں تے حملیاں لئی نیں؟ ایسے ویلے وچ جڈوں خیبر پختونخوا پہلے ای بدامنی تے دہشت گردی دا شکار اے، حکومت دی پہلی ترجیح امن بحال کرنا ہونی چاہیدی اے، نہ کہ اسلحہ کلچر نوں ودھانا۔ ایس بل دی سب توں خطرناک شق اوہ اے جس ہیٹھ اسمبلی ممبراں نوں گرفتاری، ایف آئی آر تے قانونی کارروائی توں بچان دی کوشش کیتی گئی اے۔ جے کوئی قانون بنان والا قانون توڑے، جیل بھنے، سرکاری جائیداد نوں نقصان پہنچائے یا کسے حساس تھاں تے حملہ کرے، تے کیہ اوہنوں وی قانون توں اتے سمجھیا جائے گا؟ اینیاں مراعتاں تے شاید مغلِ اعظم نے وی اپنے لئی نہیں سن منگیاں۔ پاکستان دا آئین ایس طرحاں دی چھٹی صرف صدرِ مملکت نوں دیندا اے، اوہ وی آئینی حدّاں دے اندر۔ کسے صوبے دے اسمبلی ممبراں نوں قانون توں اتے قرار دینا آئین تے جمہوری اصولاں دی سدھی خلاف ورزی اے، ایس لئی ایس قانون نوں عدالت وچ چیلنج کیتا جانا چاہیدا اے۔
