مہنگائی وِچ وادھا، پاکستان دی معاشی شرح نمو وی ہدف توں گھٹ: ایشیائی بینک

رواں مالی سال وِچ معاشی ترقی 4 فیصد ہدف توں گھٹ رہن دا امکان، مہنگائی دی شرح ودھ کے 8.3 فیصد تک جا سکدی اے: ایشیائی بینک

براعظم ایشیا وِچ مجموعی ترقی دا رجحان برقرار رہن دی توقع، ایشیائی ترقیاتی بینک نے معاشی ترقی دے امکاناں دی رپورٹ جاری کر دتی

اسلام آباد: ایشیائی ترقیاتی بینک (ADB) نے خبردار کیتا اے کہ پاکستان وِچ مہنگائی ودھے گی تے معاشی شرح نمو وی ٹارگٹ توں گھٹ رہے گی، مہنگائی دی اوسط شرح ودھ کے اٹھ اعشاریہ تن (8.3) فیصد تک پہنچ سکدی اے، جدکہ رواں مالی سال وی معاشی ترقی 4 فیصد دے ہدف توں گھٹ رہن دا امکان اے۔ پاکستان وِچ معاشی ترقی دا تخمینہ 3.7 فیصد لایا گیا اے۔

ایشیائی ترقیاتی بینک نے براعظم ایشیا وِچ معاشی ترقی دے امکاناں بارے رپورٹ جاری کر دتی اے، جس دے مطابق بھارت دی معاشی شرح نمو 6.6 فیصد نال پہلے نمبر اُتے اے جدکہ بھوٹان دوسرے نمبر اُتے اے۔ سری لنکا دی معاشی شرح نمو 4 فیصد تے نیپال دی 3.9 فیصد رہن دا امکان ظاہر کیتا گیا اے۔

اے ڈی بی دے مطابق افغانستان دی معاشی شرح نمو 2.3 فیصد رہن دی توقع اے جدکہ مالدیپ دی معاشی ترقی دی شرح صرف اِک فیصد رہن دی پیش گوئی کیتی گئی اے۔ رپورٹ وِچ آکھیا گیا اے کہ جنوبی ایشیا دے وکھو وکھ ملکاں دی معاشی کارکردگی اندرونی اصلاحات، سرمایہ کاری، برآمدات تے عالمی معاشی حالات توں متاثر ہووے گی، پر خطے وِچ مجموعی طور اُتے ترقی دا رجحان برقرار رہن دی امید اے۔