ملک وچ تربیلا تے منگلا توں بعد ایک بھی وڈا ڈیم نہیں بنایا گیا، بھارت نے 5 ہزار ڈیم بنائے: چیئرمین واپڈا
واٹر اینڈ پاور ڈیویلپمنٹ اتھارٹی (واپڈا) دے چیئرمین محمد سعید نے آکھیا اے کہ پاکستان نوں پانی دی سکیورٹی لئی سنجیدہ کوشیشاں دی لوڑ اے، ملک وچ تربیلا تے منگلا توں بعد ایک بھی ڈیم نہیں بنایا گیا جدکہ بھارت نے پنج ہزار ڈیم بنائے۔
واٹر اینڈ پاور ڈیویلپمنٹ اتھارٹی (واپڈا) دے چیئرمین محمد سعید نے آکھیا اے کہ پاکستان نوں پانی دی سکیورٹی لئی سنجیدہ کوشیشاں دی لوڑ اے، ملک وچ تربیلا تے منگلا توں بعد ایک بھی ڈیم نہیں بنایا گیا جدکہ بھارت نے پنج ہزار ڈیم بنائے۔
سینیٹ دی قائمہ کمیٹی آبی وسائل دا اجلاس سینیٹر جام سیف اللہ خان دی زیرِ صدارت پارلیمنٹ ہاؤس وچ ہویا۔ کمیٹی نوں دسیا گیا کہ خیبر پختونخوا نے تجاوزات دے 227 مقاماں دی نشاندہی کیتی اے جنہاں چوں صرف 18 مقاماں دی سیٹلائٹ تصویراں حاصل کیتیاں جا سکیاں نیں، جدکہ پنجاب نے 2737 مقام رپورٹ کیتے نیں-
چیئرمین کمیٹی نے ہڑھ (سیلاب) دی پیش گوئی تے دریائی نظم و نسق وچ جدید ٹیکنالوجی دے استعمال دی لوڑ تے زور دتا تے آکھیا کہ پاکستان وچ دریائے چناب تے واٹر سٹوریجز دی تعمیراں بارے خصوصی اجلاس بلایا جائے، انڈس واٹر ٹریٹی دے تناظر وچ مستقبل دے آبی ذخائر دی تعمیر تے قومی آبی سلامتی دے اثرات تے کمیٹی دے خصوصی اجلاس وچ انڈس واٹر کمشنر، وزارتِ خارجہ، عالمی بینک، این ڈی ایم اے تے فیڈرل فلڈ کمیشن نوں بھی بلایا جائے۔
رکن کمیٹی خلیل طاہر نے دریائے راوی وچ تجاوزات بارے سوال چکیا کہ پچھلے سال راوی وچ ہڑھ آون نال ارباں دا نقصان ہویا سی، اس تے چیف انجینئر پنجاب نے دسیا کہ دریائے راوی توں آبادیاں ہٹا دتیاں گئیاں نیں۔
چیئرمین کمیٹی نے آکھیا کمیٹی نوں دریائے راوی وچ تجاوزارت ہٹان بارے معلومات درست ہونیاں چاہیدیاں نیں، کچھ لکایا نہ جائے، جے معلومات غلط ثابت ہوئیاں تے معاملہ استحقاق کمیٹی نوں بھیج سکدے آں۔
چیئرمین واپڈا محمد سعید نے آکھیا کہ پاکستان پانی دی توڑی (قلت) دا شکار اے، پاکستان نوں پانی دی سکیورٹی لئی سنجیدہ کوشیشاں دی لوڑ اے، پاکستان نے تربیلا منگلا توں بعد ایک بھی وڈا ڈیم نہیں بنایا جدکہ بھارت نے 5 ہزار ڈیم بنائے۔
اوہناں دا کہنا سی کہ نیلم جہلم پن بجلی منصوبہ بند پیا اے، منصوبے تے انکوائریاں چل رہیاں نیں، امید اے مارچ 2028 تک منصوبہ دوبارہ بحال کر لواں گے۔
اوہناں دا ہور کہنا سی کہ سندھ وچ نئی گاج ڈیم دا معاملہ عدالت وچ اے، اس تے کم رُکیا ہویا اے، نئی گاج ڈیم نال دادو تے سیہون وچ ہڑھ رُک سکے گا، 28 ہزار ایکڑ اراضی کاشت ہو سکے گی، ڈیم تے 23 ارب روپے خرچ ہو چکے نیں، نئی گاج ڈیم دے کنٹریکٹر نے جعلی بینک گارنٹی جمع کرائی سی، معاہدہ منسوخ کر دتا سی۔
