پٹرولیم مصنوعات دیاں قیمتاں وچ وادھا، پٹرول 13.18 تے ڈیزل 13.80 روپے مہنگ
پٹرول دی نویں قیمت 310 روپے 71 پیسے، ہائی سپیڈ ڈیزل دی 323 روپے 30 پیسے فی لٹر مقرر؛ مٹی دا تیل 11 روپے 19 پیسے، جیٹ فیول وی مہنگا
پٹرول تے لیوی وچ 9 روپے 64 پیسے وادھا، 70 روپے 36 پیسے توں ودھا کے 80 روپے مقرر؛ ہائی اوکٹین تے 105 روپے فی لٹر ہو گئی، ڈیزل تے پرانی ای رہے گی
اسلام آباد (ذیشان یوسفزئی، اسلم لڑکا) حکومت نے پٹرولیم مصنوعات دیاں قیمتاں وچ وادھا کر دتا اے۔ جمعے نوں وزارتِ پٹرولیم ولوں جاری کیتے گئے نوٹیفکیشن دے مطابق، ہائی سپیڈ ڈیزل دی قیمت وچ 13 روپے 80 پیسے فی لٹر وادھا کیتا گیا اے جس توں بعد ڈیزل دی نویں قیمت 323 روپے 30 پیسے فی لٹر مقرر کر دتی گئی اے۔ دوجے پاسے پٹرول دی قیمت وچ 13 روپے 18 پیسے وادھا کیتا گیا اے، جس توں بعد پٹرول دی نویں قیمت 310 روپے 71 پیسے فی لٹر ہو گئی اے۔ نوٹیفکیشن دے مطابق، نویاں قیمتاں رات 12 بجے توں لاگو ہو گئیاں نیں تے ایہہ آؤندے اک ہفتے تیکر لاگو رہن گئیاں۔
اوگرا نوٹیفکیشن دے مطابق، مٹی دا تیل وی 11 روپے 19 پیسے فی لٹر مہنگا کیتا گیا اے، جس توں بعد مٹی دے تیل دی نویں قیمت 242 روپے 33 پیسے فی لٹر مقرر ہو گئی اے۔ حکام دا کہنا اے کہ عالمی مارکیٹ دا اثر پاکستان وچ آیا اے، پر ذرائع نے اس گل دی تصدیق کیتی اے کہ پٹرولیم ڈیویلپمنٹ لیوی وچ وی وادھا کیتا گیا اے۔
پٹرولیم ڈویژن دی دستاویزاں دے مطابق، پٹرول تے لیوی وچ 9 روپے 64 پیسے فی لٹر وادھا کیتا گیا اے تے ہن پٹرول تے لیوی 80 روپے فی لٹر کر دتی گئی اے، جیہڑی اس دی سب توں زیادہ شرح اے۔ حکومت 80 روپے فی لٹر توں زیادہ لیوی نہیں لا سکتی۔ اس توں پہلے پٹرول تے لیوی 70 روپے 36 پیسے فی لٹر سی۔
ایسے طرحاں ہائی اوکٹین تے وی لیوی وچ 9 روپے 64 پیسے فی لٹر وادھا کر دتا گیا اے تے ہن ہائی اوکٹین تے لیوی دی شرح 105 روپے فی لٹر کر دتی گئی اے۔ اس توں پہلے ہائی اوکٹین تے لیوی 95 روپے 36 پیسے فی لٹر سی۔ ڈیزل تے لیوی وچ کوئی وادھا نہیں کیتا گیا، ڈیزل تے فی لٹر 70 روپے 82 پیسے پٹرولیم لیوی ای لاگو اے۔ اس توں علاوہ پٹرول تے ڈیزل تے پنج، پنج روپے فی لٹر کلائمیٹ لیوی وی لگی ہوئی اے۔
دوجے پاسے حکومت نے مٹی دا تیل وی مہنگا کر دتا اے۔ مٹی دے تیل دی قیمت وچ 11 روپے 19 پیسے فی لٹر وادھا کیتا گیا جس توں بعد مٹی دے تیل دی نویں قیمت 242 روپے 33 پیسے فی لٹر مقرر کر دتی گئی اے، جدکہ اس دی پرانی قیمت 231 روپے 14 پیسے فی لٹر سی۔ ایسے طرحاں جیٹ فیول وی مہنگا کر دتا گیا اے۔ جیٹ فیول دی قیمت وچ 6 روپے 25 پیسے فی لٹر وادھا کیتا گیا اے۔ جیٹ فیول دی نویں قیمت 237 روپے 97 پیسے فی لٹر مقرر کر دتی گئی اے، جدکہ اس دی پرانی قیمت 231 روپے 72 پیسے فی لٹر سی۔
