خانیوال، جہانیاں، کبیروالا وچ الیکٹرو بس عوام دا حق اے، کسے دا احسان نہیں: مریم نواز

خالق آباد تلمبہ روڈ دے ٹٹے ہوئے پل دی تعمیر چھیتی شروع کرن دی ہدایت، دوجے علاقیاں وچ بھی بس سروس لے کے آؤن دا اعلان؛ وزیرِ اعلیٰ نال صوبائی اسمبلی دے ممبران دی ملاقات، عوامی مسئلیاں دے حل لئی فوری کماں دا حکم، ارکانِ اسمبلی ولوں خراجِ تحسین

لاہور (نیوز ایجنسیاں) وزیرِ اعلیٰ مریم نواز شریف نے خانیوال سمیت دوجے ضلعیاں وچ الیکٹرو بس پہنچن تے شکر ادا کیتا تے آکھیا کہ خانیوال، جہانیاں تے کبیروالا وچ الیکٹرو بس عوام دا حق اے، کسے دا احسان نہیں۔ پورے صوبے دے عوام لئی 1500 الیکٹرو بساں لے کے آ رہے آں۔ الیکٹرو بس صرف اک سہولت نہیں بلکہ نویں تے جدید ٹرانسپورٹ کلچر دا آغاز اے۔ اوہناں نے خالق آباد تلمبہ روڈ ایس ایم لنک دے ٹٹے ہوئے (شکستہ) پل دی تعمیر تے مرمت چھیتی مکمل کرن دی ہدایت کیتی۔

ضلع خانیوال دے صوبائی اسمبلی دے ممبران عامر حیات ہراج، چودھری ضیاء الرحمن، رانا محمد سلیم، اکبر حیات ہراج، رانا بابر حسین عابد، اسامہ فضل، اصغر حیات ہراج تے ہوراں نال ملاقات دے دوران وزیرِ اعلیٰ مریم نواز نے ارکانِ اسمبلی ولوں دسے گئے عوامی مسئلیاں نوں حل کرن دا حکم دتا تے تلمبہ تے میاں چنوں سمیت ضلع خانیوال دے دوجے علاقیاں وچ وی چھیتی ہور الیکٹرو بس سروس شروع کرن دا اعلان کیتا۔ صوبائی اسمبلی دے ممبران نے ملتان، وہاڑی روڈ دی تعمیر تے وزیرِ اعلیٰ دی کوششاں نوں سراہیا تے ضلع خانیوال وچ الیکٹرو بس سروس شروع کرن تے مریم نواز نوں خراجِ تحسین پیش کیتا تے خانیوال دے عوام ولوں الیکٹرو بس دے آغاز تے شکریہ ادا کیتا۔

رکنِ پنجاب اسمبلی عامر حیات ہراج نے آکھیا کہ خانیوال دے عوام پاکستان دی سب توں جدید بس سروس شروع کرن تے وزیرِ اعلیٰ مریم نواز نوں سلام پیش کردے نیں۔ رکنِ اسمبلی رانا محمد سلیم نے آکھیا کہ خانیوال وچ الیکٹرو بس دا چلنا نویں تے جدید ٹرانسپورٹ کلچر دا آغاز اے۔ اکبر حیات ہراج نے آکھیا کہ کبیروالا تے دوالے دے عوام لئی الیکٹرو بس اک نعمت اے۔ چودھری ضیاء الرحمن نے آکھیا کہ جہانیاں تے نال دے لوک الیکٹرو بس چلن تے وزیرِ اعلیٰ مریم نواز شریف دے شکر گزار نیں۔

دوجے پاسے، وزیرِ اعلیٰ مریم نواز نے فیصل آباد وچ زیرِ تعمیر چھت ڈگن نال ماں تے پتر سمیت 3 بندیاں دے جاں بحق ہون تے ڈونگھے دکھ دا اظہار کیتا تے سوگوار خانداناں نال دلی ہمدردی تے تعزیت کردیاں زخمیوں نوں بہترین طبی امداد فراہم کرن دی ہدایت کیتی۔ اوہناں آکھیا کہ دکھ دی اس گھڑی وچ اسیں سوگوار خاندان دے نال کھڑے آں۔ وزیرِ اعلیٰ نے اس عزم دا اظہار وی کیتا کہ کمزور چھتاں تے دیواراں والے خستہ حال گھراں نوں ”اپنا گھر… محفوظ گھر” سکیم دے ذریعے محفوظ بناواں گے۔