نسلہ ٹاور توں متعلق فیصلے دا جی آیاں نوں (خیرمقدم) کردے آں، سندھ حکومت

فیصلہ اس مؤقف دی تائید کردا اے جیہڑا میں شروع توں ہی اپنایا ہویا سی، سعید غنی

کراچی (سٹاف رپورٹر): سندھ حکومت نے نسلہ ٹاور توں متعلق وفاقی آئینی عدالت دے فیصلے دا جی آیاں نوں (خیرمقدم) کیتا اے۔ صوبائی وزیر محنت و افرادی قوت تے سماجی تحفظ سعید غنی دا کہنا اے کہ ایہہ فیصلہ اس مؤقف دی تصدیق کردا اے جیہڑا اوہناں نے شروع توں ہی اپنایا ہویا سی۔ میڈیا نال گل بات کردیاں سعید غنی نے آکھیا کہ اوہناں نے اس ویلے نسلہ ٹاور نوں ڈھاؤن دی مخالفت کیتی سی تے ایہہ دلیل دتی سی کہ عمارت نوں مسمار نہیں کیتا جانا چاہیدا سی۔ اوہناں آکھیا کہ عمارت نوں ڈھاؤن دی بجائے، ایہدی تعمیر دی منظوری دین والے ذمہ دار افسراں یا سرکاری حکام دے خلاف قانونی کارروائی کیتی جانی چاہیدی سی۔ اوہناں دا کہنا سی کہ اس منصوبے دی اجازت دین والیاں دا قانون دے مطابق احتساب ہونا چاہیدا اے۔

اپنے اک ویڈیو پیغام وچ سعید غنی نے وفاقی آئینی عدالت ولوں ماضی وچ چیف جسٹس آف پاکستان دے کُجھ فصیلیاں نوں واپس لین دے فیصلے نوں خوش آئند قرار دیندیاں آکھیا کہ آئینی عدالت نے غلط فیصلے نوں ریکال (Recall) کر کے چنگا کیتا اے۔ ماضی وچ چیف جسٹس آف پاکستان دے نسلہ ٹاور، پویلین اینڈ تے رہائشی عمارتاں نوں مسمار کرن دے معاملے تے آواز چکن پاروں میرے خلاف توہینِ عدالت دا کیس وی بنیا، پر مینوں اس گل تے فخر اے کہ میں لوکاں دے نال کھڑا رہیا۔ امید اے کہ اگے توں عدالتیں ایہو جیہے فیصلے کردیاں ہوئیاں آئین، قانون تے عوام دے نقصان نوں دھیان وچ رکھن گئیاں۔

اوہناں آکھیا کہ ماضی دے فصیلیاں پاروں لوکاں نوں مالی تے ذہنی نقصان ہویا تے معیشت نوں وی ڈھاہ لگی، راشد منہاس روڈ تے 2021 وچ ارباں روپیاں دا انفراسٹرکچر عدالت دے حکم تے توڑ کے ملبے دا ڈھیر بنا دتا گیا سی۔ اس ویلے وی میرا ایہی مؤقف سی کہ جے تعمیرات وچ غلطی سی تاں آپریٹرز توں واپس لے کے حکومت ایہنوں عوامی فلاح لئی استعمال کر سکدی سی۔ سعید غنی نے آکھیا کہ نسلہ ٹاور نوں وی توڑن دا حکم دتا گیا، اس ویلے وی میں آکھیا سی کہ بلڈر تے افسراں دے خلاف کارروائی کرو پر عام لوکاں نوں بے گھر نہ کرو، جنہاں نے اپنی عمر دی کمائی (جمع پونجی) توں فلیٹ خریدے سن۔ اس ویلے دے چیف جسٹس آف پاکستان دے اوہناں فصیلیاں پاروں کراچی وچ تعمیراتی کاروبار رک گیا، لوکاں دی بکنگ ڈب گئی تے شہریاں دا سرکاری اداریاں تے منظوریاں (Approvals) توں اعتماد اٹھ گیا۔